"Este proxecto servirá para manter o talento en Ourense, e será un estímulo económico", salienta Olivieri
O acto de toma de posesión de David Olivieri Cechi como novo director xeral de Innovación, Tecnoloxía e Intelixencia Artificial do Concello de Ourense foi presidido onte no salón de plenos polo alcalde de Ourense, Gonzalo Pérez Jácome. Olivieri será o responsable da posta en marcha do novo Centro de Intelixencia Artificial do Concello en La Molinera. Este é un proxecto, asegurou Olivieri, “moi importante para a cidade, que vai ser un estímulo económico tanto para manter o talento como para traelo novo”.
Olivieri avanzou que desde o centro municipal “pretendemos crear novos tipos de empresas e tamén ser unha ponte tecnolóxica do que se desenvolve na Universidade, tanto a nivel básico como de proxectos, fronte ao sector privado”. O centro ourensán buscará tamén captar fondos públicos das diferentes administracións e enlazar con empresas internacionais, “e traer algunhas aquí”, sinalou. Os pasos máis inmediatos serán a contratación de persoal para que desenvolvan o seu traballo en La Molinera.
O nomeamento de Olivieri foi aprobado pola xunta de goberno local do Concello de Ourense na súa sesión do pasado xoves 6 de agosto. David Olivieri é licenciado e doutor en Física pola University of Massachusetts, e acredita experiencia e publicacións en distintos eidos da intelixencia artificial.
