O Colexio Divina Pastora recibiu un recoñecemento por ser o centro que máis relatos presentou ao certame
O salón de Plenos acolleu esta mañá a entrega de premios do II certame literario 'Relatos de Auga Intelixente', convocado pola empresa VIAQUA, e na que dous escolares de Ourense resultaron gañadores na categoría de ESO: Marieta Lage Rodríguez, do colexio Santa Teresa de Jesús, por “Mensaje de una gota de agua” (1º premio), e Iker Nogueiras Acebedo, do Padre Feijóo Zorelle, por “¿Habéis mirado alguna vez?” (2º premio). O acto serviu tamén para presentar as actividades programadas para o Día Internacional da Auga, e que consistirán en obradoiros didácticos sobre Aqualoxía e unha cata de augas nas que participarán máis de 700 escolares da cidade.
“O Concello de Ourense aplaude iniciativas coma esta, na que se involucran escolares de diferentes idades. Son eles os que están chamados a recoller esta riqueza que nós herdamos e só sendo conscientes desde as primeiras fases da vida podemos garantir este relevo”, explicaba o alcalde, Jesús Vázquez. Os relatos gañadores foron lidos en público polos seus autores no acto de entrega de premios despois de ser escollidos de entre máis de 300 propostas presentadas por colexios de toda a comunidade por un xurado composto por especialistas en auga e literatura infantil. O premio, unha tableta electrónica e un libro electrónico para os dous primeiros clasificados, ademais dun recoñecemento para o centro que máis relatos presentou ao certame: o Divina Pastora de Ourense.
Actividades Día Mundial da Auga
A concelleira de Educación, Belén Iglesias, que tamén asistiu ao acto xunto co director de Viaqua en Galicia, Julio Masid Bande, anunciou durante a entrega de premios as actividades que terán lugar para escolares da cidade con motivo da celebración do Día Mundial da Auga, o 22 de marzo baixo o lema “A auga e o emprego”.
A primeira delas, dirixida ao alumnado de Educación Primaria, chámase 'Aqualoxía': mediante os xogos interactivos online, un total de 564 escolares de 13 colexios da cidade traballarán na clase os usos da auga, ou os tratamentos que debemos facer para poder bebela ou para devolvela ao medio natural. A segunda é unha cata de auga, que terá lugar o venres na Praza Maior dende as 8:45 horas e dirixida ao alumnado de ESO (138 alumnos en total).
