A demora na reforma do túnel de Ramón Puga chegará ao Congreso dos Deputados a instancias do BNG. O grupo nacionalista rexistrou onte unha instancia ao Goberno central para executar a obra, xa que cada día que pasa "é un día más de perigo e risco de accidente", segundo manifestou o voceiro municipal do BNG, Luis Seara, percepción que ten tras consultar aos veciños do propio barrio.
Os nacionalistas chaman a aproveitar que ata o 25 de xuño a vía entre Ourense e Zamora permanecerá cortada para obras de reparación das vías estragadas polo accidente do Alvia, segundo informou o Administrador de Infraestructuras Ferroviarias (ADIF), para facer os traballos no túnel.
O deputado do BNG no Congreso, Néstor Rego, rexistrou preguntas sobre os motivos polos que non se asina o convenio dos pasos de Ramón Puga e máis o de Tarascón, cando "as partidas orzamentarias xa se atopan pertinentemente asignadas tanto polo Concello como por ADIF".
Non é a primeira vez que a formación nacionalista pregunta sobre esta obra, que é unha reivindicación constante nos últimos anos nas que se promoveron iniciativas en institucións a nivel estatal, autonómico e local, "ademais de impulsar a recollida de máis de 600 sinaturas entre a veciñanza do barrio afectado", lembrou Seara.
Un ano co proxecto
"Non entendemos por que non está asinado xa o convenio para reformar os pasos de Tarascón e Ramón Puga que darían luz verde ás obras despois de levar máis dun ano redactado o proxecto", insistiu o voceiro do BNG.