Gonzalo Caballero: "Se mantemos o proxecto, lograremos credibilidade"

Gonzalo Caballero aspira a lograr este sábado a confianza da militancia do PSdeG para dar continuidade a un liderado que exerce desde 2017 tras derrotar nas primarias a Juan Díaz Villoslada. Agora, pelexa co alcalde das Pontes e presidente da Deputación de A Coruña, Valentín González Formoso, poñendo en valor que só en caso de victoria o partido manterá un proxecto de esquerdas e galeguista, que confronta cun “de máis connivencia coa dereita”. Satisfeito con esta longa campaña? Teño moi boas impresións, percibo un amplo apoio da militancia de base, coa vontade de seguir avanzando e non retroceder. Quero un apoio masivo para conseguir que o PSdeG avance pola esquerda, o galeguismo, ecoloxismo e feminismo. O proxecto plantado hai catro anos empezou a xerminar e hai que darlle tempo para dar froitos. Quero un partido que funcione de abaixo arriba, o modelo das baronías non é o máis axeitado e por iso pido un apoio masivo. O seu rival fai fincapé no mal resultado das autonómicas. Faltou autocrítica? Tocoume ir ás autonómicas nas circunstancias máis complexas posibles. En provincias como Ourense e Pontevedra, crecemos en votos e deputados, mentres que na Coruña, onde o outro candidato é secretario provincial, tivemos menos votos e menos deputados. Nestes anos, o PSdeG mellorou, estamos moito mellor que hai catro anos. Temos que superar estas primarias para seguir crecendo e consolidando o proxecto. Critícanlle moito que faga seguidismo de Madrid. Son críticas interesadas que responden a unha unha estratexia de deslealdade pola dereita. O meu compromiso en defensa de Galicia é evidente e público. Sinto que algúns compañeiros se deixen levar por iso. As primarias poden fracturar o partido, con feridas difíciles de curar? Creo que a unidade do partido está garantida. Despois das primarias de Pedro Sánchez e Susana Díaz, o partido conseguiu avanzar. Ese é o reto que temos aquí, eu represento o perfil galeguista e de esquerdas fronte a un máis conservador e que ten máis connivencia con Feijóo e Baltar. “Represento o perfil galeguista e de esquerdas fronte a un máis conservador” Por que ten connivencia? Non me gusta atoparme en tempos de campaña ó outro candidato en actos públicos con Feijóo en vez de estar con Pedro Sánchez. Se gaña o sábado, haberá integración? Construirei os mellores equipos para que o PSdeG siga avanzando. A moitos en Ourense lles molesta que unha xestora leve case dous anos. En Ourense, o PSOE foi a primeira forza nas municipais, algo que non ocurría hai décadas. Coa pandemia, frenouse a actividade orgánica, só desde este verán puidéronse retomar as asambleas e hai un mes houbo unha maioría que dixo que a maioría da cidade está en liña coa maioría da provincia. Di sempre que non é marioneta de ninguén. Formoso si? O outro candidato dixo moitas veces que non tiña interese en dedicacións orgánicas e que ese traballo faino o seu secretario de organización, Lage Tuñas. El ten relacións con certas baronías pero a min o que me preocupa é que a militancia vote en liberdade de forma masiva e que analice como abordar unha encrucillada na que nos xogamos o futuro do PSdeG. Traballo non só para gañar as primarias, senón para gañar Galicia. “Traballo para gañar Galicia” É posible derrotar a Feijóo? Ata que chegou a covid, dábanse as condicións para ter un goberno liderado polo PSdeG. A crise sanitaria marcou un novo escenario aproveitado pola Xunta para actuar deslealmente co Estado e ir cara unha abstención do 50%. Claro que é posible gañarlle a Feijóo, íamos gañarlle en abril do ano pasado e unha vez superada a pandemia, activarei o partido para volver a resultados históricos nas locais e xerais e despois gañarlle a Feijóo. Se perde, manterá a actividade no Parlamento? Teño un compromiso cos galegos que me votaron para ser deputado e eu sempre cumpro os meus compromisos. Eu levo no Parlamento dous anos mentres Feijóo leva 16 e Pontón 17. Aínda non estou en idade de xubilación. Insiste moito en que cambiar de adestrador cada tempada non é a mellor solución. É unha lección que nos dá a historia do partido. Cando mantivemos a Touriño o PSdeG conseguiu gobernar. Se agora mantemos o proxecto acadaremos credibilidade. Tamén Felipe González perdeu dúas veces antes de gobernar, Pedro Sánchez sacou os peores resultados e agora somos primeira forza. Non hai en fronte do meu proxecto ningunha alternativa con capacidade de fortalecer o partido e de conectar máis coa cidadanía. Só hai unha suma de intereses que non é o que o PSdeG precisa.