"Investir en educación musical permitiría aumentar a calidade cultural da poboación"

O director ourensán Pablo Devigo dirixirá á Real Filharmonía de Galicia durante tres concertos que servirán como mostra de benvida á tempada da orquestra galega. O director e compositor natural de Castro Caldelas, iniciouse na música a través da gaita, o único instrumento do que impartían clases na súa vila. Anos despois, gradouse en Composición e Dirección e mudouse aos Estados Unidos onde recentemente foi nomeado director asistente da Carmen Symphony Orchestra. Cal é a temática dos concertos? Os concertos teñen unha temática acorde á tempada da Real Filharmonía de Galicia, neste caso é a natureza a través da visión da mesma por parte de distintos compositores e épocas. Por que neste caso son gratuítos? Posiblemente co obxectivo de presentar a tempada e atraer á xente que normalmente non vén a este tipo de eventos. Deste xeito terán a oportunidade de introducirse na música clásica e coñecer a orquestra da súa cidade. Estudas e traballas nos Estados Unidos. Por que volves a Galicia? Alí foi onde me xurdiu a primeira oportunidade para traballar, pero estou moi agradecido de que a Real Filharmonia de Galicia contactara conmigo unha vez máis. Xa o fixera para para asistir a ópera en galego de Fernando Buíde. Para a min non é só un pracer, senón un orgullo poder traballar cunha orquestra galega. Ten moito valor sentimental traballar con eles e dirixir para xente que coñezo e que xente que me coñece poida vir ao concerto e participar nese tipo de iniciativas. A música clásica pode ser elitista ou é accesible para toda a sociedade? Precisamente a Real Filharmonía ten unha política á hora de programar e de contar con iniciativas que están fóra do tradicional, que axudan a que haxa unha mellor relación entre a orquestra e a súa comunidade. É unha responsabilidade de orquestras e intérpretes a tarefa de achegar o repertorio á xente. A música clásica na súa orixe non foi elitista, estaba completamente integrada na sociedade italiana e alemana. Nun momento determinado, o seu desenvolvemento si que se centrou nun tipo de público, pero particularmente hoxe en día, tal e como están as cousas para a cultura en xeral, sería un erro non incluir iniciativas que extendan a base do público que xa temos. Como se pode manter o contacto coa xente nova? Hai moitos camiños para chegar á música clásica. As orquestras deben incluir repertorios accesibles e ao mesmo tempo, vemos como os cruces entre estilos musicais como o pop e o sinfónico tamén parecen funcionar ben. Pero o máis importante é investir en educación musical, porque está demostrado que aumenta a calidade cultural da poboación.