Os socialistas ourensáns escolloren aos seus nove delegados no Congreso provincial celebrado este sábado
O PSdeG-PSOE da provincia de Ourense celebrou o Congreso extraordinario co gallo de escoller aos delegados e delegadas que representarán á provincia no vindeiro 39 Congreso Federal en Madrid.
Abriu o congreso provincial, a Secretaria de Organización provincial, María Quintas. Nesta xornada, acreditáronse 91 delegados e delegadas dos 106 posibles, que participaron democraticamente en todos os aspectos que comprendía a orde do día establecida.
A xornada comezou coa escolla da mesa que dirixiu o congreso, de xeito totalmente consensuado, onde se integraron representantes das sensibilidades que acadaron representación. O presidente foi proposto pola candidatura encabezada por Rocío de Frutos e vicepresidencia e secretaría de actas, a proposta da candidatura de Rafael Rodríguez Villarino.
A seguir establecéronse unhas quendas de palabra para que todos os asistentes que así o desexaran expresasen os seus pareceres sobre a xestión dos órganos federais, dirixidos durante dous anos e medio polo actual Secretario Xeral federal escollido en primarias, Pedro Sánchez e posteriormente pola Xestora que dirixe a organización ata a culminación do Congreso. A continuación tiveron lugar as exposicións sobre as emendas á ponencia-marco que se vai debater en Madrid en xuño, aceptándose a súa proposición para seren debatidas no propio Congreso Federal.
Como remate produciuse a votación das dúas listaxes que onte se presentaron para conformar a lista dos 9 delegados e delegadas que representarán aos socialistas da provincia de Ourense neste vindeiro Congreso Federal. Por unha banda, presentouse unha lista pechada e cremalleira, tal como esixen as normas, por parte dos afíns a Pedro Sánchez, encabezada pola deputada estatal Rocío de Frutos e outra lista, de similares características, con Rafael Rodríguez Villarino, alcalde de Amoeiro, á fronte. O resultado do escrutinio, con 91 votantes acreditados, foi o que segue: a candidatura encabezada por De Frutos obtivo 44 votos e a que liderou Rodríguez Villarino tivo un apoio de 42 votos. Houbo 1 voto nulo e 4 votos en branco. Cos resultados na man, e seguindo as normas establecidas polo Partido Socialista, configurouse unha lista de 9 delegados e delegadas de xeito proporcional en función do voto obtivo neste congresiño. Así pois, a listaxe dos e das representantes do PSOE de Ourense no Congreso Federal serían:
- Rocío de Frutos Madrazo
- Ángel Barba Alonso
- Ofelia Puente Carracedo
- Juan Carlos Francisco Rivera
- Soraya Martín Barreiro
- Rafael Rodríguez Villarino
- Elvira Lama Fernéndez
- Francisco Fumega Piñeiro
- María Jesús Boo Montes
Con esta elección, quinto punto da orde do día do congreso extraordinario provincial, deuse por concluída a xornada na sede dos socialistas ourensáns, destacando o respecto pola toma de decisións dunha organización democrática.
