O presidente da Deputación de Ourense, Manuel Baltar, apelou este luns á presunción de inocencia para o delegado da Xunta na provincia, Rogelio Martínez, despois de que o Xulgado de Instrución número 1 de Ribadavia anuncie un procedemento contra el polo caso das subvencións europeas.
En declaracións aos medios, Manuel Baltar apelou a 'respectar en todo momento' a presunción de inocencia, dado que se trata dunha cuestión 'relacionada cun proceso xudicial aberto'. 'Sempre digo o mesmo e debo aplicalo, sexa unha persoa afiliada a un partido ou a outro', indicou Baltar.
Paralelamente, apostou tamén por un 'respecto escrupuloso' aos pronunciamentos dos órganos xurisdicionais. 'Sigo mantendo o mesmo, ata que haxa unha resolución de carácter xudicial', sentenciou.
REFORMA LOCAL
Por outra banda, Manuel Baltar falou tamén sobre a reforma local que prepara o Goberno, a cal, explicou, é un 'texto aberto' e unha 'decisión valente' por parte do Executivo central.
Manuel Baltar recordou que a Deputación de Ourense 'enviou unha serie de alegacións' ao borrador da lei e sinalou que o proxecto, 'moi mellorade con respecto á primeira versión', atópase xa en fase de tramitación parlamentaria, onde poderán 'introducirse novidades' a través dos partidos políticos.
Para Manuel Baltar, este 'texto aberto' intenta 'recoller ás demandas do municipalismo' e recolle 'unha vía concreta que fala de potenciar as deputacións'.
