A Subdelegación do Goberno en Ourense acolleu onte a reunión da Comisión de Coordinación Provincial para a seguridade viaria en situacións extremas co obxectivo de actualizar o Protocolo de actuación na provincia. A súa intención é reducir o número de tramos con restricións ao tráfico e evitar as retencións de vehículos.
O subdelegado do Goberno en Ourense, Emilio González Afonso, destacou como na campaña 2020-2021 serán utilizados nas estradas da provincia 23 camións quitaneves. A súa función será asegurar a viabilidade da circulación de vehículos ante a predición de precipitacións en forma de neve. Do mesmo xeito, atópanse almacenadas 5.494 toneladas de sal e 110.000 litros de salmoira, reservas que poderían ampliarse se a ocasión o require.
En canto ao persoal implicado, o Ministerio de Transportes, Mobilidade e Axenda Urbana conta con 62 persoas dispoñibles para o mantemento das vías. Ademais, tamén se dispón de 16 estacións meteorolóxicas distribuídas pola provincia e 18 cámaras repartidas polas estradas nacionais e nas autovías do territorio que permitirán coñecer de forma inmediata as condicións meteorolóxicas e a situación do tráfico na rede de estradas.
Emilio González apelou á importancia de "o respecto ás normas de tráfico, a responsabilidade ao volante e a adopción de medidas de protección ante temporais de neve e frío", incidindo na necesidade de consultar as predicións meteorolóxicas e o estado das estradas cando se vaia a realizar calquera desprazamento a través da páxina web da Dirección Xeral de Tráfico ou no teléfono 011.
