O Concello inviste 18.000 euros para fomentar o emprendemento local
Oito novas empresas de Barbadás veñen de ser elixidas as beneficiarias dunha subvención concedida polo Concello, a través da Concellería de Promoción Económica, que dirixe o tenente de alcalde, Xosé Manuel Fírvida, para "colaborar á consolidación de iniciativas empresariais e comerciais recentes e que poidan situarse no camiño da dinamización económica e social", segundo explicou o edil nacionalista.
Estas axudas incrementáronse nun 50% respecto ás previsións iniciais, pasando de 12.000 a 18.000 euros. Isto debeuse ao número de solicitudes que finalmente se presentaron "que nos parecían o suficientemente interesantes e ben enfocadas tanto para resultar exitosas como para aumentar o esforzo orzamentario", apuntou Fírvida.
Malia todo, dúas empresas que solicitaron a devandita axuda quedaron fóra ao rematarse o crédito dispoñible da entidade municipal. O criterio de eliminación foi establecido en función da orde de solicitude.
Cinco, a mulleres
Das oito iniciativas que recibirán a subvención, cinco están lideradas por mulleres. A contía que percibirán son 2.500 euros para cada unha en sete casos –é a contía máxima–, máis outros 500 euros para outra das iniciativas presentadas.
Fírvida amosouse "saisfeito" pola participación, o cal "nos indica que estamos no camino axeitado coas medidas de estímulo á actividade empresarial, que aplicamos por segundo ano consecutivo para favorecer o asentamento de novos negocios e contribuir a impulsar a creación de postos de traballo".
