"Todos somos iguais independentemente do lugar no que nacemos, e a igualdade é un alicerce fundamental no que apoiarse para a construción da sociedade", sinalou o alcalde de Ourense
O Auditorio de Ourense acolleu esta mañá, con motivo do 18 de decembro, Día Internacional das Migracións, o Ourense Acolle, un acto no que participaron os nenos e nenas dos programas da Concellería de Asuntos Sociais e das institucións de axuda 'Juan Soñador', MIRA (Colombia), Alma Llanera (Venezuela) e AISO (Senegal), e que quixo darlle visibilidade ao fenómeno migratorio na cidade, onde hai censadas máis de 3.100 persoas que se viron forzadas a deixar os seus países de orixe.
Xunto a integrantes de todos os partidos da corporación municipal, nin a concelleira de Asuntos Sociais, Sofía Godoy, nin o alcalde de Ourense, Jesús Vázquez, quixeron perder o acto: “Todos somos iguais independentemente do lugar no que nacemos, e a igualdade é un alicerce fundamental no que apoiarse para a construción da sociedade”, dixo, ao tempo que animou a “construír un mundo mellor, máis solidario e máis feliz” aos máis de cen rapaces asistentes ao acto.
Ourense Acolle foi conducido por Mohamed, técnico responsable das aulas de apoio a inmigrantes, quen foi dando paso ás diferentes actuacións musicais -Alma Llanera e Saman Ensemble e Mira- e á confección dun mural, en forma de árbore, no que rapaces de diferentes nacionalidades querían colgar os seus desexos e frases conmemorativas do día. Ao remate do acto, todos os participantes realizaron unha cadea humana desde a sala principal ata o primeiro piso do Auditorio, onde a Fundación Juan Soñador colocou unha exposición fotográfica titulada 'La mirada también habla'.
O acto acabou sendo unha festa para todos os nenos e nenas participantes, e tamén para os colexios presentes no acto. A todos eles se dirixiu o alcalde na súa alocución final: "Entre todos podemos avanzar e realizar un excepcional labor atendendo e dándolle cobertura ás persoas inmigrantes de Ourense, promovendo a súa inserción social, apoiándoas na consecución das súas metas e orientándoas para unha mellor autonomía de vida e defendendo a igualdade de oportunidades", dixo.
