Os acordes da música tradicional non soarán mañá domingo nas rúas e prazas do burgo medieval de Vilanova dos Infantes (Celanova), como tampouco exhibirán a súa arte os artesáns dos vellos oficios tradicionais galegos. O coronavirus obrigou a suspender a Romaría Etnográfica Raigame, que cada 17 de maio celébrase no burgo medieval, pero os organizadores queren manter vivo na rede o espíritu festivo do Día das Letras Galegas.
"A tráxica mala fada que xa nos privou da súa celebración no ano 2015, volveu este ano, con máis virulencia se cabe, e obrigounos a botarlle o cancelo á Romaría cando andábamos entrelazando as derradeiras barazas da súa organización", apuntaban fontes do Concello de Celanova e da Deputación de Ourense quenes convocaron, a veciños e visitantes asiduos á festa, a unha celebración virtual.
A idea é celebrar Raigame sen saír de casa e "de 10 en 10" como permite esta primeira fase da desescalada marcada polo Goberno central, celebrando unha comida familiar ou entre amigos "e logo compartir as imaxes da festa na rede co cancelo #Raigame2020", explican os organizadores, quenes tamén propoñen compartir imaxes dando fe da presenza noutras edicións anteriores de Raigame ou mesmo colgando vídeo deixando patente o que significa a festa de Raigame para cada un.