"Saír da crise precisa dun gran pacto que priorice a sanidade e a educación públicas"

Como faría balance da súa labor tras ano e medio á fronte do Colexio, e cales son os seus obxectivos? Cando asumín o cargo en 2019 xa levaba dez anos na xunta directiva, así que coñecía ben o seu funcionamento. Síntome moi respaldada. A nosa función é dar soporte de todo tipo: formación, servizos, facilitar o acceso a convenios… En Ourense somos 380 colexiados e crecendo, en Galicia 5.000 e en toda España 50.000. Durante o confinamento, levamos a cabo actividades de formación online, emitimos certificados para que os colexiados se puideran desprazar libremente, firmamos un convenio coa Deputación para dar soporte de asesoramento…Foi moito traballo, non se distinguían os fins de semana dos días laborables. Vostede foi a primeira muller en dirixir un colexio de economistas en Galicia. De 50 decanos en España, só 3 somos mulleres, as correspondentes aos colexios de Ourense, León e Almería. Isto fixo que a Asociación de Executivas de Galicia me incluíra na súa lista de referentes galegas. Entre os escenarios posibles con respecto á covid, cre que a vacina chegará pronto e polo tanto a recuperación se limitará a restablecer o perdido, ou pola contra teremos que aprender a vivir e ser rentables dentro desta nova normalidade? Inclínome pola segunda opción. Creo que a vacina terá que esperar un tempo, polos posibles efectos secundarios que hai que testar. Debemos convivir coa enfermidade e intentar que afecte á menor xente posible. Podería nomear algunha das consecuencias da pandemia que lle parezan máis graves? A min, que o vexo de primeira man ao ser nai de tres fillos, preocúpame moito o tema educativo. A OMS xa advertiu das secuelas irreversibles do peche das escolas para moitos nenos, que ao non acceder ao colexio quedan incluso sen unhas condicións alimentarias e de vida dignas. Pode ser unha xeración perdida, porque a niveles superiores non tanto, pero para a escola primaria é fundamental o ensino presencial. Crearía polo tanto un efecto dominó? As escolas teñen un gran efecto positivo en canto á conciliación laboral. Se as clases non son presenciais, moitas mulleres abandonarán o mercado laboral ao exercer como principais coidadoras, e logo non lles será fácil volver. Ademais, en Galicia hai unha pobreza do 20%, a fenda dixital é importante e moitos pais non contan coa formación necesaria para facer de soporte aos mestres e axudar aos seus fillos. Veremos as grandes consecuencias disto a medio e longo prazo. Cales son as fortalezas e debilidades da provincia de Ourense? A nosa fortaleza son os sectores agroalimentario e vinícola, así como a industria da automoción ou o téxtil, e debilidades a ter en conta a dispersión e o declive demográfico. Temos que actuar pronto para unirnos ao carro da dixitalización, e remar cara adiante entre todos. Tiñamos aínda a crise de 2008 no retrovisor e agora chega esta. Cal pensa que é a máis dura? Eu creo que a actual, unha crise sanitaria que afecta a case todo o mundo, xeralizada, con consecuencias a todos os niveis. Ademais, este virus non afecta igual a todas as clases sociais, países, empresas ou barrios, segundo as condicións hixiénicas nas que se conviva en cada un. Cal é a receta para saír desta crise? Un gran pacto para orientar as políticas priorizando a sanidade e a educación públicas, e cambiar o modelo productivo para que haxa máis industria e esteamos abertos a un número maior de mercados, confiando tamén no noso comercio local e de proximidade. A situación dos ERTE, agora que se están prolongando no tempo, pode supoñer un problema? O ERTE foi o mellor mecanismo de protección durante o estado de alarma, para saír da situación con dignidade. Pero agora moitos destes ERTE están mudando en ERE. Para algúns sectores continúan a ser fundamentais, pero os gobernos deben impedir que certas empresas os manteñan indefinidamente. De feito, as sociedades mercantís que se acolleran aos ERTE e non cotizaron por eses traballadores neste exercicio fiscal non van poder repartir beneficios en 2020 salvo que abonen as respectivas cuotas á Seguridade Social. É un dos grandes debates: os impostos deben subirse ou baixarse? Está claro que hai que aumentar a recadación, xa que os impostos deben chegar a un número elevado de poboación e para iso se precisa unha suba de impostos progresiva e acorde coa capacidade económica de cada un, xa sexa a partir do IVA ou cun recargo extraordinario no IRPF.