As Xuventudes Socialistas de Galicia (XSG) empezaron este sábado co I Congreso Provincial de Ourense a súa adaptación á estrutura provincial en consonancia coa do PSdeG. Todos os militantes participaron directamente na elección de Mario Tarrío, militante da agrupación municipal ourensana, como coordinador provincial.
Na súa intervención, Tarrío advertiu de que a xuventude ourensana está 'farta dos enchufismos da saga caciquil dos Baltar' e destacou a súa vocación de 'articular unha acción conxunta' de todas as agrupacións 'salvando as discrepancias'.
'É fundamental visibilizar de forma conxunta o traballo e a loita en defensa de algo moi importante como son os nosos valores e militar con orgullo nesta organización', proclamou o recén elixido coordinador provincial da provincia.
Pola súa banda, o secretario xeral das XSG, Aitor Bouza, destacou que 'a adaptación á estrutura provincial da organización' empezou con este congreso e continuará no resto de provincias ao longo deste mes.
