Neste evento participarán máis de 2.300 empresas e entidades procedentes de 208 países
O Parque Tecnolóxico de Galicia dará soporte ás pemes galegas interesadas en manter encontros bilaterais con outras empresas ou entidades no marco do Mobile World Congress, o maior evento do mundo no ámbito das comunicacións móbiles, que se celebrará en Barcelona entre o 26 de febreiro e o 1 de marzo.
Neste evento participarán máis de 2.300 empresas e entidades procedentes de 208 países, que mostrarán as últimas innovacións en dispositivos móbiles, mentres se desenvolve un amplo programa de relatorios no que se darán a coñecer os retos e tendencias máis relevantes para o futuro do sector.
A Tecnópole terá acceso á lista de participantes, no seu papel de coorganizador do Brokerage Event que se celebra entre os días 26 e 28 de febreiro no marco da feira, polo que ofrece soporte ás pemes galegas para xestionar a busca de contactos adecuados, así como para concertar reunións con eles.
2.000 reunións bilaterais
Durante a pasada edición, o evento acolleu preto de 2.000 reunións bilaterais nas que participaron 429 empresas e entidades de 43 países de todo o mundo, o que supón "un marco de oportunidade moi relevante para encontrar socios tecnolóxicos e comerciais a nivel internacional", indican desde a Tecnópole.
