A firma ourensá é unha das representantes españolas no ranking elaborado por Deloitte
Puig, a galega Sociedad Textil Lonia, compañía que comercializa as marcas Purificación García e CH Carolina Herrera, Tous e a marca de reloxos Festina Lotus son os representantes españois no `top 100` das maiores compañías de luxo no mundo, segundo a última edición do informe `Global Powers of Luxury Goods 2017` elaborado por Deloitte, no que España está presente por cuarto ano consecutivo.
As vendas acumuladas do catro grandes grupos españois supera os 2.802 millóns de euros en 2015. Destaca o crecemento das vendas de Festina Lotus, que alcanza un 14,5%, seguido de Tous (9,9%) e Puig (9,1%), mentres que Sociedad Textil Lonia é a que rexistra unha maior marxe de beneficios, que alcanza o 9,7%.
O sector do luxo a escala mundial atravesa un dos seus mellores momentos, como certifica o feito de que, durante o pasado ano fiscal, as vendas aumentasen un 6,8%, impulsadas polos mercados emerxentes. En total, as 100 maiores compañías alcanzaron unha facturación conxunta de 212.000 millóns de dólares, segundo o informe.
LVMH Moët Hennessy-Louis Vuitton, Compagnie Financiere Richemont e The Estée Lauder Companies consolidan as súas posicións nas primeiras posicións do ranking.
Completan o `top 10` Luxottica Group, Kering, The Swatch Group, L`Oréal Luxe, Ralph Lauren Corporation, Chow Tai Fook Jewellery Group Limited e PVH Corporation.
TURISMO DE COMPRAS
Segundo o estudo, o crecemento do sector do luxo pode atribuírse en gran medida aos consumidores procedentes de economías emerxentes.
En Rusia, China e os Emiratos Árabes (tres dos categorizados como mercados de luxo emerxentes), o 70% dos consumidores aumentaron o seu orzamento destinado a gastos, que contrasta co 53% rexistrado en mercados máis maduros como Xapón ou Estados Unidos.
Ademais, case a metade das compras de luxo realízanse nun contexto viaxeiro, xa sexa nun mercado estranxeiro (31%) ou no aeroporto (16%). Esta proporción aumenta ao 60% entre os consumidores dos mercados emerxentes.
A posibilidade de adquirir produtos a prezos máis alcanzables é un dos principais motivos para a compra de produtos de luxo fóra do mercado nacional (43%), así como o acceso a un catálogo máis amplo (43%).
