O vicepresidente segundo da Xunta de Galicia, Diego Calvo, confirmou que a primeira fase das obras do parque acuático de Monterrei estarán en funcionamento este verán, aínda que evitou dar unha data concreta para o inicio da actividade.
Calvo revisou onte, xunto ao secretario xeral para o Deporte, José Ramón Lete Lasa e o delegado territorial da Xunta en Ourense, Gabriel Alén, os avances nas obras. Os traballos da primeira das catro fases do parque comezaron o pasado mes de febreiro e está previsto que finalicen ao longo deste verán, de forma que a zona das piscinas e tobogáns poida estar dispoñible para os veciños e visitantes. O novo contrato destas obras, asinado o pasado novembro, conta cun importe de máis de 5,7 millóns de euros, aos que se suman 1,3 millóns de euros das actuacións levadas a cabo pola anterior adxudicataria, que renunciou ao contrato polo encarecemento dos materiais.
Pola súa banda, o alcalde de Pereiro, Luis Menor, lembrou que esta é a “mostra do compromiso” da Xunta con esta inversión, “a máis grande que ten en activo a Xunta en toda a comunidade”.
O total do proxecto de reforma do novo complexo lúdico-deportivo de Monterrei nas súas catro fases conta cun orzamento inicial de máis de 10 millóns de euros, do que a Xunta achega o 50% e a Deputación a outra metade.
