O rexedor de A Gudiña, José María Lago, desprazouse ata Santiago para manter un encontro coa conselleira de Medio Ambiente, Ángeles Vázquez, e avanzar no proxecto para impulsar unha nova candidatura a reserva da biosfera ante a Unesco para o territorio que abrangue os concellos ourensáns de A Gudiña, Riós, Vilariño de Conso e A Mezquita.
Lago foi un dos promotores desta iniciativa que pretende poñer en valor e preservar a riqueza que atesoura unha parte importante do municipio que goberna, recoñecida xa como zona Rede Natura. Neste senso, a Consellería de Medio Ambiente analizará a posibilidade de acadar esta declaración, tal e como manifestou Ángeles Vázquez ante o rexedor local.
As reunións continuarán durante o vindeiro mes de setembro, cando a directora xeral de Patrimonio Natural, Belén do Campo, recibirá, nunha nova xuntanza, aos alcaldes dos catro concellos, que desexan iniciar, canto antes, a tramitación administrativa necesaria para optar á declaración dos seus entornos como reserva da biosfera. Nesta liña, José María Lago trasladoulle á conselleira a importancia deste proxecto para os catro municipios e considerou "fundamental" poder contar coa experiencia, o apoio, e o asesoramento da Consellería de Medio Ambiente dende o primeiro momento.
Segundo datos da administración autonómica, Galicia conta con seis reservas da biosfera que ocupan ao redor do 25 por cento de todo o territorio da comunidade. Son as reservas de Terras de Miño, Os Ancares lucenses e Montes de Cervantes, Navia e Becerreá; río Eo, Oscos e Terras do Burón; área de Allariz; As Mariñas coruñesas e Terras do Mandeo, e tamén o Xurés-Gerês.
A comezos deste mes de agosto presentouse oficialmente a candidatura coa que a Ribeira Sacra e as Serras do Oribio e Courel aspiran a converterse na séptima reserva da biosfera de Galicia.
A figura de reserva da biosfera foi creada pola Unesco para mellorar a relación das persoas coa súa contorna natural e supón un dos recoñecementos de carácter internacional máis importantes.
