O Clúster Tecnolóxico Empresarial das Ciencias da Vida de Galicia (Bioga) entregou hoxe no Porriño os seus segundos premios de biotecnoloxía á compañía AMSlab como empresa máis competitiva e a QubioTech como a mellor idea empresarial en 2014
O Clúster Tecnolóxico Empresarial das Ciencias da Vida de Galicia (Bioga) entregou hoxe no Porriño os seus segundos premios de biotecnoloxía á compañía AMSlab como empresa máis competitiva e a QubioTech como a mellor idea empresarial en 2014.
AMSlab, con sede en Lugo, está especializada no desenvolvemento de solucións analíticas para sectores como o químico, farmacéutico, agroalimentario, ambiental ou téxtil.
O xurado valorou a súa aposta innovadora a través dun "equipamento e capital humano altamente cualificado" así como a súa "forte expansión internacional", ao estar presente en seis países e tres continentes, informa Bioga nun comunicado.
QubioTech é unha iniciativa empresarial en fase de constitución con sede na Coruña, que xurdiu a partir dun desenvolvemento do Servizo de Medicina Nuclear do Hospital Clínico Universitario de Santiago de Compostela.
Dedícase ao desenvolvemento de novas ferramentas tecnoinfomáticas para a mellora do diagnóstico, tratamento e seguimento médico.
No seu accionariado participan os investigadores que levaron a cabo o proxecto, así como a Fundación Ramón Domínguez.
O xurado que elixiu os gañadores entre as 14 candidaturas recibidas estivo formado por representantes de Bioga, empresas galegas consolidadas como Nanogap ou Lonza Biologics, a Universidade de Santiago de Compostela e a Axencia Galega de Innovación.