Pedrosa propón un modelo que permite predicir problemas de continuidade en empresas con problemas financieiros
"As consecuencias da actual crise financeira levaron a Europa a cuestionar a suficiencia da normativa existente en materia de auditoría de contas”, sinala a investigadora María Áurea Pedrosa, que na súa tese de doutoramento, dirixida polo profesor da Facultade de Ciencias Sociais e da Comunicación Francisco López Corrales, analiza un tipo de auditorías pouco estudadas ata o de agora, as de aquelas empresas que non cotizan nos mercados de valores. Segundo salienta Pedrosa Rodríguez, nestes períodos de crise “xérase un especial interese polos informes de auditoría”, motivo polo que na súa tese propón o deseño dun modelo estatístico que permitiría aos auditores predicir a continuidade da xestión das empresas con problemas financeiros.
A tese de doutoramento "Resposta dos auditores ao principio de empresa en funcionamento durante a crise financeira. Un estudo empírico aplicado ás empresas españolas non cotizadas" tiña como obxectivo, relata Pedrosa, “comprobar se a crise financeira en España afecta á propensión dos auditores a emitir nos seus informes opinións cualificadas por problemas de continuidade”. Con ese propósito, a investigadora e profesora no IES Chan do Monte de Marín compara as auditorías realizadas a empresas españolas, “todas con problemas financeiros”, nos anos previos á crise, concretamente durante os anos 2006 e 2007, coas realizadas nun contexto de crise, representado neste estudo polo período que abrangue de 2008 a 2010.
