Anxo Baranga: “En Barcelona fago case toda a miña vida en galego, catalán e un pouco de castelán"

Anxo Baranga posando xunto a unha árbore no Barco. (Isaac Cruz)
photo_camera Anxo Baranga posando xunto a unha árbore no Barco. (Isaac Cruz)

En 1979, Anxo López Baranga “Anxo Baranga” deixaba a aldea vilamartinesa de Córgomo para establecerse en Barcelona. Son máis de catro décadas que non evitaron que este valdeorrés regrese á súa terra natal tódolos veráns. Este ano, ten un aliciente máis, festexar que o Día das Letras Galegas de 2022 estea centrado na figura do bardo local, Florencio Delgado Gurriarán (1903-1987).


Bota de menos ao seu Córgomo natal cando está en Barcelona? 

Si. Estou esperando que chegue o verán. Estou co proxecto “En Construción”, poñendo personaxes na fachada da casa. Agora estou coas mulleres ás que lles deron as Letras Galegos. Quero crear arredor da casa a liña do tempo de Galicia, desde a época dos castros. Vouna repartir nas diferentes épocas e eventos galegos e debuxar liñas paralelas co que pasaba en Córgomo. 

“En Barcelona, sempre estou esperando que chegue o verán”

Ten algún outro proxecto para este verán?

Este ano tamén me dediquei moito a contar contos nas aldeas pequenas nun proxecto de Furafollas. É marabilloso, a xente está moi agradecida.

“Este ano tamén dediquei o verán a contar contos nas aldeas pequenas, nun proxecto de Furafollas”

Mantén contacto con outros valdeorreses en Barcelona?

Estou na Asemblea Cultural de Barcelona, na que son o máis vello. Hai un montón de rapaces de Valdeorras que van estudar alí. Alí, fago a maior parte da miña vida en galego, catalán e un pouco de castelán. O idioma que máis emprego é o galego. Imos contar contos nas escolas de Primaria e facémolo en galego. Estamos dúas horas con nenos de 6 a 12 anos que nunca escoitaron o galego e enténdeno perfectamente.

“Deberíase usar máis o galego nas empresas, que se etiquete o viño na nosa lingua”

Este ano, co poeta de Córgomo Florencio Delgado protagonista do vindeiro Día das Letras Galegas, as vacacións lle terán un sabor especial.

É unha marabilla. Ter o Día das Letras Galegas cun poeta valdeorrés, de Córgomo, é unha tarxeta de presentación e quen ten unha empresa ou asociación pode dicir: “Eu son de onde se fai o Día das Letras Galegas”. Antes, cando organizabamos un acto cultural en Córgomo e chamabamos a un grupo de A Coruña ou Vigo dicían que Valdeorras estaba moi lonxe e o ano que ven somos o centro. Deberíamos ser quen de demostrar que somos merecedores de iso e usar máis o galego nas empresas, que se etiquete o viño na nosa lingua.

Te puede interesar