“Temos que aproveitar os nosos recursos e a proximidade de zonas máis turísticas"

Nome: Eladio Santos Martínez Lugar e ano de nacemento: O Barco, 1964 Formación: Licenciado en Xeografía e Historia Profesión: Mestre Eladio Santos Martínez incorporou onte ao equipo de goberno socialista de O Barco, ocupando o lugar que deixou a exconcelleira Irene Dacal Feijoo. O novo edil ocuparase da Concellería de Promoción Económica, Turismo, Comercio e Consumo. "Ao sector turístico hai que darlle pulo en tres aspectos: a enoloxía, o turismo de natureza e o patrimonio natural e cultural". "Imos apoiar ao comercio en dúas liñas: que se desenvolva en novos métodos de venta, a través de Internet, e tentar que non decaiga o comercio na rúa, nas tendas". Como valora o labor de Irene Dacal? Traballou anos potenciando o turismo e o comercio. Eses aspectos hai que seguilos impulsando e se fai falta darlle a volta a algunha se fará, falando cos interesados. Que será o primeiro que faga tras tomar posesión? O primeiro será enviar unha carta de presentación aos colectivos do comercio, falar co Centro Comercial Aberto, a Asociación Empresarial de Valdeorras e, xa dentro do sector turístico, coa Ruta do Viño e coas empresas de deporte e aventuras. Está mal aproveitado o potencial turístico de O Barco? Estábase empezando a facer moitas cousas, mais non é fácil. Partiuse dunha situación na que o sector turístico non tiña relevancia. Temos que aproveitar os nosos recursos e tamén a proximidade a zonas máis avanzadas turísticamente, como a Ribeira Sacra ou o Bierzo e mesmo Sanabria ou o Courel. Agora é o momento de potenciar ese turismo de natureza e interior. Suporá beneficios económicos para a comarca e o Concello. Cales son os seus plans? A orientación estratéxica que manexo para o sector turístico é darlle pulo a tres aspectos: o baseado na enoloxía, e o Concello ten moi boa relación coa Denominación de Orixe Valdeorras e a Ruta do Viño; o turismo de natureza, para o cal imos contactar coas empresas adicadas a este campo; e o patrimonio natural e cultural, que aínda ten posibilidades por descubrir. O Barco ten de todo e o Concello coordinará e apoiará ás empresas Como apoiará ao comercio? O comercio preocúpanos moito porque é moi importante para O Barco. Hai moitos postos de traballo e a vila ten un comercio vivo. Estamos nun momento importante e delicado pola covid-19. Hai que apoiar ao comercio en dúas liñas: Tentar que o comercio se desenvolva en novos métodos de venta, coa exposición dos produtos en Internet e, se é posible, coa venta na rede. Ademais, hai que buscar que non decaiga o comercio na rúa, nas tendas. Que a xente salga a mercar segura. Aquí, os comercios son absolutamente rigurosos coas normas de seguridade.