ENTROIDO

Vilariño ultima o seu Entroido de Interese Turístico

eeeentr_result
photo_camera Desfile do Entroido en Vilariño de Conso.

Os xoves de Compadres e de Comadres inauguran a festa máis ancestral do municipio

O Xove de Comprades inaugura o próximo 16 de febreiro o Entroido en Vilariño de Conso. A Asociación “Xuntos polo Fulión” programou múltiples actividades para promocionar esta celebración no municipio, que se prolongará ata o día 1 de marzo, rematando co Enterro da Sardiña. Os veciños de Conso conmemoran neses días unha das celebracións máis ancestrais do lugar, este ano declarada Festa de Interese Turístico de Galicia. Comezará ás 20,00 horas coa ronda de fulión polo pobo e colga do lardeiro; mentres que para o 23 de febreriro está previsto o Xoves de Comadres coa ronda de fulión e colga da lardeira. Ambas xornadas rematarán como é tradicional cunha cea de homes e outra de mulleres. 

O día 25 os fulións visitarán as adegas e acabarán na carpa que estará habilitada na praza para degustar o tradicional “porco ao espeto”. A partir das 20,00 horas terá lugar o Concurso de Disfraces e posteriormente festa a cargo da disco móbil A Gramola.

O 26 é o día grande do Entroido, que comezará coa lectura do pregón e deseguido fulións de tódalas parroquias do concello coas súas carrozas percorreran as rúas de Vilariño nun desfile que se prolongará ata a hora de xantar. En torno as 14,30 horas, no pavillón polideportivo, celébrase a XXVIII Festa do Cabrito, verdadeiro referente da gastronomía de Vilariño de Conso, onde máis de 1.000 persoas degustarán este manxar.

Para o martes, ás 19,00 horas, na praza de Vilariño, está prevista a queima do lardeiro e a lardeira ao son dos bombos e gadañas. O mércores terá lugar o Enterro da Sardiña. Ás 20,00 horas a sardiña percorrerá as rúas para ser queimada no Toural e deseguido celebrar a tradicional sardiñada. Ademais, para o 28 de febreiro está programada a terceira Mascarada Ibérica en Vilaariño, e o 29 en Viana do Bolo, con 26 comparsas de Galicia, Zamora, Asturias, Cantabria e Portugal. 

Te puede interesar