Un total de cinco compañías participan na novena edición do "Festival de Títeres" do Carballiño, que se desenvolve na praza dos Irmáns Prieto dende o pasado luns e ata o vindeiro venres, baixo a organización da Concellería de Educación e Cultura.
Os cativos xa puderon disfrutar dos espectáculos "A noite dos monstruíños", a cargo da compañía Títeres Duende Sico, o día 14, mentres onte a quenda foi para a compañía Títeres Alakrán, coa obra "Soños na gaiola", que encantou ó público asistente. Co mesmo horario das 19,30 horas, Títeres Tanxarina representará hoxe "As bombas e o xeneral", mentres o xoves, a compañía Ti e máis eu Teatro porá en escena a obra "A troita do Arenteiro".
Para a xornada de clausura do venres, día 18, está prevista a realización, ás 12,00 horas e na devandita praza, dun obradoiro ecolóxico para a creación dun boneco con materiais de refugallo. Xa na habitual sesión de tarde, a compañía A Xanela do Maxín ofrecerá o espectáculo de monicreques "Títeremusiconto".