O ciclo cultural, presentado onte, levará concertos e outras actividades por toda galicia en setembro e outubro
O ciclo 'Espazos Sonoros' regresa nas sua VIII edición da man de 10 citas musicais que se celebrarán en diferentes lugares e escenarios singulares pola súa "grande relevancia patrimonial", nas catro provincias galegas. Entre eses espazos está o Mosteiro Cisterciense de Oseira, segundo se salientou onte en Santiago no acto de presentación desta iniciativa. Concertos, actividades, charlas ou percorridos de diverso tipo, son algunhas das propostas que inclúe a programación que, segundo destacou o secretario xeral de Cultura, Anxo Lorenzo, é o "máis ampla posible" e "de acceso gratuíto".
Belén Bermejo, directora artística do ciclo, explicou que durante as oito semanas que abrangue a cita, entre o 13 de setembro e o 28 de outubro, os asistentes "terán a oportunidade de aprender dos distintos espazos e o seu ámbito", ademais de gozar "dunha mostra do mellor talento artístico" de Galicia e dunha ventá para coñecer "o que se está a facer noutros escenarios do mundo". O festival abrangue dende a música vocal e de cámara, ata música antiga, "tendendo pontes" cara a outros estilos e públicos ao tempo que xera "empatía cos espazos" nos que se desenvolverán os concertos.
O conxunto A Morra inaugurará a cita, o 13 de setembro, na Igrexa de San Nicolao de Cis, en Oza-Cesuras, seguidos do Coro Vox Stellae e os Menestreis de 1.500 no Colexio de Nosa Señora dá Antiga ou do Cardeal, en Monforte (o sábado 19) e dun taller de achegamento á música antiga, o día 26, no refectorio de Santa María A Real de Oseira, en San Cristovo de Cea.
En outubro, o día 3 haberá 'Escoitas', no CGAC, con Tunde Jegede e Diana Baroni, e a actuación de La Macorina, o día 4 San Lourenzo de Carboeiro, en Silleda. O Quinteto Egeria actuará, pola súa parte o día 10 en Adegas Roandi, O Barco, e Herbens Consort o 11 en Santa María de Aciveiro, en Forcarei (Pontevedra).
O ciclo pecha con Joel Frederiksen, na Igrexa de Santa Liberata de Baiona, o domingo 18; Fernandez&Quintá, no Museo Massó de Pontevedra, o día 24, cunha actuación que xirará sobre unha zanfona histórica; e con Óscar Ibáñez Trío no Museo de Pontevedra, con motivo da presentación do libro Xan Tilve, Gaiteiro de Campañó. n
