José Miñones, delegado do Goberno en Galicia, desprazouse ata o sureste ourensán onde visitou os concellos da Mezquita e da Gudiña para coñecer sobre o territorio o impacto dos programas do Goberno sobre a cidadanía de ambos municipios.
Fíxoo acompañado polo subdelegado do Goberno na provincia, Emilio González. En ambos concellos, o delegado reuniuse cos seus alcaldes, Rafael Pérez e José María Lago, e coas corporacións municipais para presentarlles as liñas dispoñibles para vivenda, transición ecolóxica, e administración pública, e recoller tamén as súas demandas e opinións.
Miñones avanzou na Mezquita o impacto dos investimentos en dixitalización que está a executar o Goberno, a través do Ministerio de Asuntos Económicos e Transformación Dixital, nestes concellos. Esta acción forma parte do Programa UNICO-Banda Ancha, dentro do Plan de Recuperación, Transformación e Resiliencia do Goberno. “Estamos dando o paso para garantir o 100% de cobertura de acceso a internet de alta velocidade na Mezquita e da Gudiña”.
