No CEIP Carmen García Carrasco están inmersos en numerosos proxectos na procura dunha formación integral do alumnado. Unha das iniciativas céntrase na alimentación equilibrada e a práctica de actividade física como base dunha vida sa
No Concello de Cenlle está ubicado o CEIP Carmen García Carrasco, un centro educativo de Infantil e Primaria no que a pesar de ser poucos nenos e nenas realizan numerosas actividades e proxectos ao longo de todo o curso.
Conchi Pérez e o seu equipo do Xornal Escolar de Telemiño quixeron compartir un día cos escolares de Cenlle, que os recibiron cos brazos aberto e con moitas ganas de amosarlle a intensa actividade que hai cada día no colexio.
Uxía, Antía e Alexandre foron os encargados de presentar o centro educativo e preguntarlle aos seus compañeiros que estaban a facer e o que máis lles gusta do seu colexio.
En Cenlle, ademais de estudar as materias propias de cada nivel educativo, están inmersos en varios proxectos e actividades complementarias coas que buscan a formación integral dos seus alumnos e a que estes aprendan cousas interesantes para a vida dun xeito lúdico e participativo.
Este curso seguen a traballar nos Hábitos de vida saudable, pero nesta ocasión centrados especialmente na alimentación equilibrada e a práctica de actividade física como base para levar unha vida sa. Andainas pola contorna do centro, xuntanzas deportivas, visita ao mercado, charlas de alimentación, obradoiro de receitas saudables ou a elaboración de murais polas diferentes conmemoracións no que a alimentación e o deporte estiveron moi presentes son só algunhas das interesantes propostas que compartiron este curso.
No CEIP Carmen García Carrasco tamén contan cun horto e un composteiro, onde aprenden a cultivar produto saudables, coñecen a importancia de aproveitar os restos de comida orgánicos e, o máis importante, observan con ledicia como o seu traballo da os seus froitos. Na actualidade contan con cenorias, calabacíns, leitugas, fresas, etcétera.
Ademais das actividades realizadas no centro, os nenos e nenas de Cenlle participan en numerosas actividades fóra do recinto escolar, saídas e visitas culturais que tanto lles gustan e coas que aprenden cousas moi interesantes que resultan un reforzo ao aprendido previamente na aula. Destacan as xuntanzas con outros centros da contorna, tanto para celebracións como foi o caso do Día das Letras Galegas cos escolares do CRA Amencer; unha convivencia no CPI de Maside; ou probas deportivas cos nenos de Amoeiro, Coles e Maside. En definitiva, experiencias únicas e complementarias que enriquecen a aprendizaxe dos nenos que comparten vivenzas que nunca esquecerán.