Os vendedores ambulantes autónomos das feiras da provincia de Ourense, representados por AGAA afirman estar "tremendamente agradecidos ao alcalde do Concello de Ribadavia pola súa implicación para adaptar a feira á nova normativa". Os responsables municipais xa teñen todo programado para recibir o próximo luns aos máis de cen postos que habitualmente acuden a esta feira quincenal.
"Non estamos dacordo ao 100% coa nova ubicación, pero entendemos que neste concello é a única alternativa para poder manter as medidas de seguridade", sinalan os vendedores, ao mesmo tempo que matizan que "esta nova ubicación será temporal, nós queremos volver a onde estábamos, unha vez remate a pandemia".
Coinciden co alcalde, César Fernández, en que "Ribadavia será o exemplo a seguir polo resto dos concellos da provincia" e recordan que "levamos 70 días sen poder traballar, se continuamos así arruinámonos".
Ademais, insisten en que "a nosa actividade está permitida dende o día 11 de maio e os concellos teñen o deber de contribuir á reactivación económica local, da que somos un motor importante", e instan aos restantes concellos a organizar as feiras co 100% dos postos.
