Imprimir

Beariz rehabilitará o marco medieval da Mesa dos Bispos

La Región | 14 de octubre de 2017

O marco xurisdicional está ubicado nunha inca privada, cerca da estrada N-541.
O marco xurisdicional está ubicado nunha inca privada, cerca da estrada N-541.

Esta peza da Baixa Idade Media dividía as xurisdicións eclesiásticas de Ourense, Santiago e Lugo 

A Dirección Xeral do Patrimonio Cultural autorizou o proxecto de actuación arqueolóxica para a posta en valor do marco Mesa dos Bispos, situado na localidade de As Antas, en Beariz. A intervención será levada a cabo polo arqueólogo Jorge Lamas Bértolo e o seu equipo, que ten previsto comezar o próximo martes. Trátase dun marco datado na Baixa Idade Media e Época Moderna ubicado no punto de encontro das xuridicións eclesiásticas de Ourense, Santiago e Lugo e que tamén dividía outras tres xurisdicións laicas, a de Montes, a de Caldelas de Orcellón e a do Deza, segundo apunta Jorge Lamas.

 

 

Os traballos consistirán na limpeza da parcela na que se localiza o marco e a escavación arqueolóxica dunha cata de 2x1 metros aproximadamente no contorno do marco co fin de retiralo e comprobar en que condicións se atopa a parte soterrada e a que profundidade. Coas excavacións tamén se persigue localizar posibles restos doutras tres pedras que formarían parte do conxunto “Mesa dos Bispos". Posteriormente delimitarase o espazo e farase unha limpeza do marco.

"Pretendemos axardinar a contorna e recolocar o marco xurisdicional porque agora está inclinado e mal orientado, tamén se colocará un panel explicativo de como era esa zona fai 400 ou 500 anos", indica o arqueólogo.

O marco ten forma rectangular, un metro de alto, 50 centímetros de ancho e 25 de grosor, e ten as inscricións ORS, que corresponde a xurisdición de Ourense; TO, de Santiago e LG, de Lugo.

"Está nun lugar importante de encontro de camiños, de arrieiros de paso entre Santiago e Pontevedra, e está dentro do Camiño Miñoto Ribeiro", señala Jorge Lamas.

Respecto da súa importancia histórica, engade o arqueólogo que "é dos poucos marcos que se conservan a nivel documental e físico", asegurando que "non coñecemos ningún outro marco na comarca que delimite tres xurisdicións tanto eclesiásticas como laicas".

O Concello de Beariz posúe unha importante riqueza arqueolóxica, con numerosas mamoas e castros, entre outros restos. O Concello tamén está agora á espera de obter autorización e conseguir financiación para escavar no castro de Magros.

Jorge Lamas foi tamén o director das escavacións que se levaron a cabo recentemente, en torno aos meses de marzo e abril pasados, na Torre Medieval de Godás, no Carballiño. Os traballos deixaron ao descuberto os muros desta torre defensiva do século XIV, que agora xa pode ser visitada.

Puede ver este artículo en la siguitente dirección https://www.laregion.es/articulo/o-carballinho/beariz-rehabilitara-marco-medieval-da-mesa-bispos/20171014105350741730.html


© 2019 La Región

© La Región S.A.

Contenidos con licencia Creative Commons