Imprimir

Bugallo condena ante o Apóstolo a violencia machista

La Región | 25 de julio de 2019

bugallo
Xosé Sánchez Bugallo durante a Ofrenda ao Apóstolo.

O rexedor compostelán exerceu como delegado do Rei por cuarta vez na Ofrenda ao Apóstolo Santiago

O alcalde de Santiago, Xosé Sánchez Bugallo, reclamou este xoves ao Apóstolo Santiago unha "sociedade igualitaria", á vez que lamentou a "secuela" da violencia machista. Ademais, tivo palabras para lembrar ás vítimas do accidente do Alvia na curva de Angrois, porque aínda que se cumpriron xa seis anos, "a dor segue estando presente".

Así se pronunciou o rexedor compostelán durante a tradicional Ofrenda ao Apóstolo Santiago celebrada cada 25 de xullo, Día do Apóstolo e tamén Día de Galicia. Na cerimonia, que este ano se trasladou á Igrexa de San Martiño Pinario debido ás obras no interior da Catedral, Bugallo exerceu como delegado do Rei por cuarta vez.

Durante a súa intervención, dixo que as institucións e gobernantes deben "erradicar de raíz" a violencia machista, que "acaba de golpear de novo", para despois pedir ao Apóstolo que guíe "cara a unha sociedade máis xusta e tolerante". Así mesmo, o alcalde puxo o foco na educación, nas persoas maiores, no desemprego e na loita contra o cambio climático.

Tras o delegado rexio, o arcebispo de Santiago, Julián Barrio, asegurou que "ninguén" pode esquecer a "sombra de dor" das vítimas do Alvia e pediu a Santiago que "interceda" polos gobernantes "para que saiban atopar, en diálogo sereno e respectuoso coa verdade, solucións aos problemas políticos, sociais e culturais".

Na Ofrenda ao Apóstolo, así como no desfile de tropas previo que tivo lugar na Praza do Obradoiro, estiveron tamén presentes o presidente da Xunta, Alberto Núñez Feijóo; o presidente do Parlamento galego, Miguel Santalices; e o presidente do Tribunal Constitucional, Juan José González Rivas; ademais doutros membros do Goberno galego e da corporación municipal.
Puede ver este artículo en la siguitente dirección https://www.laregion.es/articulo/galicia/bugallo-condena-apostol-violencia-machista-recuerda-dolor-angrois-sigue-estando-presente/20190725122335884284.html


© 2021 La Región

© La Región S.A.

Contenidos con licencia Creative Commons