Medio cento de persoas participaron no congreso que se celebrou na vila
Medio cento de personas participaron ao longo da xornada de onte no congreso Foro Boi 700, que organizou a Asociación Cultural Xan de Arzúa en Allariz. O fogar dos maiores alaricano foi o esceario polo que pasaron investigadores, profesores, estudiantes e moitas persoas interesadas nos temas que se sometían a debate.
O historiador Antonio Blanco, xunto co alcalde, Francisco Rodríguez, e o vicerreitor do campus de Ourense, Virxilio Rodríguez, foron os encargados de abrir o foro.De seguido, Francisco Javier Pérez, profesor de Historia Medieval, ofrecía a primeira ponencia, sobre o Allariz do século XI ao XIII e sucedíao no estrado Beatriz Vaquero, profesora tamén de Historia Medieval, quen analizaba as fontes históricas da vila.
Logo dunha pequena pausa, María Gloria de Antonio Rubio, investigadora do CSIC, analizaba a presencia dos xudeos en Allariz, aportando moitos datos sobre esta comunidade e a evolución da súa presencia na vila, na que comezaron asentándose na zona baixa, detrás da muralla, e acabaron na zona alta. Sinalou que o seu número foi menor do que se cría, convivindo cunha comunidade moito máis ampla, como era a cristiana.
JuanAntonio Seara Ferro, técnico de Cultura do Concello de Allariz, analizou o Allpariz do século XVIII e a Festa do Corpus, parte da tese doutoral na que está a traballar. Unha mesa redonda, na que participaron todos os relatores que interviñeran ata ese momento puxo fin á xornada matutina.
Xa pola tarde, Arnoia Bouzas, menbro do Mestrado de Antropoloxía Cultural da Universidade de Boloña, expuxo o esforzo e iniciativas que se levaron a cabo no eido pedagóxico para divulgar a Festa do Boi. José Martínez Crespo, profesor de Historia, analizou a figura de Xan de Arzúa, comparándoa con outras figuras moi semellantes, aínda que cada unha coas súas connotacións, como pode ser o Xan Carallás de Redondela.
As dúas últimas intervencións do Congreso correron a cargo de Pablo Sánchez Ferro, director do Arquivo Histórico Provincial de Ourense, que analizou documentación de Allariz a través dos séculos, e Anselmo López Carreira, profesor da UNED, que abordou o urbanismo do Allariz Medieval. Unha mesa redonda cos relatores da tarde puxo o punto final ao Congreso.
O historiador Antonio Blanco, organizador e coordinador do congreso, amosaba a súa satisfacción "porque se cumpríu a idea matriz que perseguiamos: una vez recuperada a Festa do Boi, queriamos dar resposta a por que corre o Boi por Allariz e cremos que o congreso tivo o éxito que perseguiamos".
