Os recintos termais privados de Ourense empezan a reabrir as súas portas, tras dous meses e medio pechados, con estritas medidas de seguridade e capacidade limitada. As termas de Outariz (Ourense) e Prexigueiro (Ribadavia) reabriron, pero os usuarios teñen que pedir cita previa para poder acceder ás instalacións e deberán seguir circuítos previamente sinalizados para gozar do baño.
En Prexigueiro, os usuarios terán que se duchar na casa e deben acceder ao recinto con máscara, aínda que non dentro das piscinas. En Outariz, o recinto está limitado ao 30%, o que supón ao redor de 55 persoas, e por tramos máximos de dúas horas para desinfectar as instalacións. Os usuarios deben pedir cita previa e só poden acceder dous días seguidos. Hai un máximo de cinco persoas por reserva. "Recibimos moitas chamadas a fin de semana", confirman nestes dous recintos.
