O rexedor Luciano Rivero logrou incrementar a porcentaxe de apoios para o PP na comarca
Luciano Rivero enfróntase ao seu cuarto mandato consecutivo en Cualedro. O rexedor popular foi o único, xunto a Ana María Villarino -alcaldesa de Oímbra-, que logrou incrementar a porcentaxe de apoios para a formación de Pablo Casado na comarca.
Como afronta esta nova etapa?
Con moita ilusión. É un orgullo e unha honra para mín ser, por cuarta vez consecutiva, alcalde do pobo que me viu nacer. Incrementouse o apoio á lista do PP de Cualedro ata case un 80 por cento e, debido a que noutras localidades o partido non acadou este respaldo, creo que debemos recoñecer que as urnas nos enviaron unha mensaxe nítida. Eu gobernarei para todos: os que me votaron e os que, democráticamente, optaron por outras formacións.
Cales son as necesidades máis urxentes que ten o concello?
Sen dúbida xerar emprego e fixar poboación. Tamén no apartado máis lúdico e de ocio hai moita demanda, sobre todo da xente que vén de fóra, para que fagamos unha piscina municipal. Xa tivemos contacto tanto con Alberto Núñez Feijóo como con Manuel Baltar e comprometéronse a sacala adiante. Xa lles solicitei audiencia a ambos de novo para tentar que se consolide o proxecto.
Que medidas tomará para frear a perda de poboación?
Estamos traballando en varias liñas. Por unha banda, reactivando as terras abandonadas para poñelas en producción. Tamén regularemos a ordenanza das novas vivendas sociais premiando ás familias numerosas e seguiremos apoiando ao sector primario. Queremos que todo o que se produza en Cualedro se chegue a transformar no noso futuro parque.
En que punto se atopa o parque empresarial?
Estamos co plan sectorial. Unha das cousas boas será a ubicación, enlazada directamente coa autovía A-52. O metro cadrado será moi asequible.
Que potenciais ten Cualedro para desenvolver?
Temos unha poboación moi envexecida, algo que é un problema, pero tamén un recurso, porque se lle pode dar un servizo como así se fixo coa nova residencia. Tamén temos un importante sector primario, viticultura e apicultura.
Que obxectivos se marca para este novo mandato?
O asentamento de empresas e a construcción do parque empresarial. Queremos, por outra parte, que Cualedro forme parte da Denominación de Orixe de Monterrei, xa que contamos con zonas vitivinícolas como San Millán e San Martiño. Outra das miñas grandes teimas é loitar pola boa comunicación co concello de Laza. Dende alí para chegar a Ourense teñen que dar un gran rodeo, e por Cualedro sería máis doado. Ademais queremos seguir potenciando os nosos castros e a investigación etnográfica e arquitectónica.
Que cre que premiaron os seus veciños para ter este respaldo?
A proximidade de todo o equipo de goberno municipal, somos moi accesibles.