Ribeiro en Común pide que se aumente a máis núcleos do municipio as axudas para rehabilitación. Reclaman que se inicien os proxectos para os núcleos de Francelos, San Paio e Santo André. Con tal motivo rexistra unha nova moción para que desde o Concello de Ribadavia se amplíen as axudas de rehabilitación a máis núcleos históricos do municipio. Neste sentido piden que se comecen desde xa a redactar os seus proxectos para os núcleos históricos que poidan axustarse a este requisito.
Para Ribeiro en Común esta debe ser unha tarefa a realizar sen máis demora, comezando por Francelos, San Paio e Santo André, ademais de outros núcleos que poderían sumarse como Sanín.
Este grupo municipal xa logrou que se aprobara no pleno de novembro do ano pasado esta proposta, que volve a presentar despois de que esta semana se asinara un novo convenio entre o Concello e Ministerio de Fomento, dándolle continuidade ao Plan de Vivenda 2018-2021.
Nese sentido, sinala que este convenio de outubro de 2019 ven a continuar o asinado en outubro de 2018, para que propietarios de inmobles no casco histórico de Ribadavia e San Cristovo que reformen as súas vivendas poidan optar a subvencións públicas do Estado e da Xunta. "Polo tanto, non é un plan novo", puntualiza.
Así mesmo, Ribeiro en Común engade que este "novo convenio é froito de meses de traballo técnico da oficina municipal do concello". Son 216.650 euros do Estado máis 56.550 da Xunta en subvencións para un máximo de 12 vivendas.