Imprimir

Sabela Rodríguez: "A educación social confúndese moitas veces coa disciplina do traballo social"

Elisabet Fernández | 17 de octubre de 2020

Sabela Rodríguez Vázquez.
Sabela Rodríguez Vázquez.
A educadora social Sabela Rodríguez analizou as redes de apoio comunitario durante a crise do covid

Sabela Rodríguez graduouse en Educación Social pola UVigo cun traballo final sobre as redes de apoio comunitario durante a crise do covid. Esta ourensá egresada do Campus analizou como funcionaron algunhas destas estruturas de colaboración para xestionar unha situación nova, a da pandemia que nos cambiou a vida e na que afloraron novas necesidades entre a cidadanía. Rodríguez Vázquez recorda como non hai tanto, ao inicio do estado de alarma, as máscaras estaban esgotadas e costureiras profesionais e amateurs puxéronse mans á obra. Son só un dos exemplos que esta educadora social recolleu no seu estudo. 

Ía facer un traballo sobre Benposta e cambiou de idea.

Deille voltas durante meses e como pasou todo isto da pandemia empecei a ver cada vez máis iniciativas deste tipo nas redes sociais e pareceume que estaba relacionado cos obxectivos da educación social.

Que analiza na investigación?

Cinco casos de redes de apoio comunitario distribuídos por todo o Estado. Grupos de axuda mutua e redes de máscaras solidarias.

Como funcionaron e de que serviron durante os momentos máis duros da pandemia?

Supuxeron un apoio importante cubrindo dereitos fundamentais porque xurdiron moitas necesidades ás que a administración non estaba sendo capaz de responder. As redes de apoio mutuo chegaron a un número de persoas moi importante. Sorprendeume a rapidez coa que se organizaron.

Que tipo de perfil está detrás destas redes?

Xurdían en base a un tecido social que xa existía. Xente que xa participara en boy-scouts ou axudando na parroquia... Sorprendeume que nos grupos que analicei, as persoas que participaban eran maioritariamente mulleres.

Chama a atención.

Si. É unha actividade moi relacionada co traballo de coidados, seguramente sexa por iso.

O papel do educador social está infravalorado?

Creo que a nivel social hai un descoñecemento moi grande da educación social, porque é unha disciplina que moitas veces se confunde co traballo social. En Galicia non está contemplada a figura do educador social na esfera pública, mentres que noutras comunidades si se contempla nos centros educativos ou nos hospitais, por exemplo. Moitas veces asóciase a figura do educador cun labor asistencialista. No traballo tratei de ver outros ámbitos, como fomentar a participación social. 

Puede ver este artículo en la siguitente dirección https://www.laregion.es/articulo/ourense/sabela-rodriguez-educacion-social-confundese-moitas-veces-coa-disciplina-do-traballo-social/20201016225038979119.html


© 2020 La Región

© La Región S.A.

Contenidos con licencia Creative Commons