O Concello de Verín elaborou un protocolo especial de cara á celebración do Día de Todos os Santos. Como anunciara xa a pasada semana o rexedor local, Gerardo Seoane, efectivos de Protección Civil colaborarán nun operativo co que se pretende evitar as aglomeracións de persoas no cemiterio e dada a situación que se vive actualmente pola pandemia do covid.
Por unha banda, o horario de apertura e peche desta instalación os días 30 e 31 de outubro e 1 e 2 de novembro prolongarase dende as 09,00 horas, ata as 21,00 horas, ampliándose, desta maneira, o habitual para así facilitar as visitas a todos os cidadáns que queiran achegarse ao camposanto.
No que atinxe ás medidas organizativas establecerase, mediante cartelería situada en puntos estratéxicos, información sobre as normas sanitarias a seguir e Protección Civil de Verín, pola súa banda, proporcionarán xel hidroalcohólico á entrada do cemiterio. Tamén haberá un dispositivo conformado por estes voluntarios destinado a controlar o aforo no que se establecerá un máximo de catro persoas por grupo de visitas do mesmo grupo familiar e convivintes. Neste senso, a duración das visitas non poderá superar os 30 minutos.
Dende o Concello de Verín advirten que se deberá evitar o contacto físico, manter a distancia interpersoal de 1,5 metros e seguir a normativa vixente en Galicia en canto ao emprego obrigatorio de máscara cirúrxica ou hixiénica, así como da correcta hixiene de mans. Recoméndase tamén o emprego de panos desbotables.