Que a crise económica semella ter pasado é un dato que os grandes números macro evidencian case sen matices. Estamos a falar de cifras de crecemento sostibles na nosa economía, así como de un mercado laboral en clara recuperación. A tendencia positiva está piques de alcanzar os oito trimestres consecutivos, isto é, dous anos que unha referencia temporal sempre a considerar na análise económica.
Chegados a este punto xorden cuestións sobre as que cómpre reflexionar, sobre todo, botando a vista atrás cara intres no tan lonxanos. Nesta procura de leccións, o Informe de Conxuntura elaborado polo Foro Económico de Galicia proporciónanos, coma sempre dende o seu nacemento hai case tres anos, unha valiosa axuda. Da súa última presentación a semana pasada é posible concretar tres aspectos que veñen a matizar esa contorna positiva de recuperación na que se enmarca a economía galega. Nomeadamente estamos a falar da produtividade, o capital das empresas e o fenómeno da deslocalización.
A comparación entre a produtividade das empresas galegas fronte á media do conxunto do Estado ofrece unha visión negativa. Son oito puntos os que se sitúa por baixo da media española sendo, ademais, máis baixa onde máis se está crecendo e especialmente reducida na industria manufactureira, co cal a situación vese agravada en canto ás perspectivas.
Unha segunda reflexión vén dada cando se atende á dimensión do capital empresarial posto que, malia a crecer en número de empresas constituídas, o capital desembolsado é moi baixo en termos comparativos. En concreto, estase a falar dun terzo da media española ao apenas superar os 30.000 euros o que configura un panorama con novas empresas de moi reducida dimensión.
Finalmente, a marcha de actividades empresariais e, mesmo, empresas enteiras cara outro territorios continúa a se incrementar. Cabe aquí falar do Norte de Portugal que con agresivas políticas de prezos, rebaixas de impostos e flexibilizacións laborais estase a se converter nunha auténtica ameaza para sectores de fonda tradición no contexto galego.
Ante este panorama, cales debes ser os alicerces fundamentais do noso desenvolvemento económico? Pois novamente o Informe de Conxuntura do Foro dá a chave sobre os dous piares sobre o que se debería apostar. En primeiro lugar, resulta imprescindible que as empresas aumenten o seu tamaño superando un minifundismo (neste caso empresarial) que impide que as políticas industriais sexan eficaces e que se poidan aplicar economías de escala. De xeito complementario, hoxe en día non é posible entender o progreso sen o compoñente tecnolóxico. Aquí bastaría con mirar ao que están facendo determinados sectores (o conserveiro sería un bo exemplo) para ter a mellor referencia sobre o que se debe facer.
2017 será, pois, un ano de retos. Todo indica que seguiremos a crecer e confiemos que con maior intensidade. Sen embargo, en tanto e canto as cuestións sinalas non sexan contempladas, os avances se verán matizados.