Xornal Escolar
Coas enerxías renovadas no CEIP Curros Enríquez
Pasaron algo menos de tres meses dende que os escolares ourensáns despediron o curso. Dende entón, foron semanas de diversión, de viaxes e de anécdotas que agora lles irán contando pouco a pouco ós seus compañeiros, ós que tiñan moitas ganas de volver ver. De feito, é o rencontro cos amigos o momento máis agardado por todos.
Mentres os alumnos de Educación Secundaria e Bacharelato preparan hoxe as súas mochilas para a volta ás aulas, os máis de 17.000 escolares de Infantil e Primaria levan xa unha semana adaptándose ás novas rutinas, coñecendo ós novos profesores e explorando as novas aulas. Co material xa a punto, nenas e nenos están comezando a organizar os seus temarios e ultimando os detalles do material que precisan para un curso exitoso. Como é habitual, o primeiro foi un día cheo de emocións e nervios, de voltar a programar o espertador e cargar a mochila con ilusión e novos libros e libretas.
É o segundo ano escolar que inician en pandemia coa esperanza posta en que a normalidade sexa a protagonista dos próximos meses. Tanto alumnos como profesores amósanse moi satisfeitos co cumplimento das normas durante o ano pasado, se ben están desexando poder eliminar as máscaras e a distancia social do temario do curso. Coa mirada fixada en poder rematar o curso nas mellores condicións, os colexios ourensáns celebraron a volta ás aulas despois dun verán ben merecido para todas as comunidades educativas. Fotos: Óscar Pinal