AXENDA CULTURAL

Chola, a "it girl" máis rompedora

Esta influencer rectificada, interpretada por Laura Villaverde, ofrecerá aos espectadores un auténtico show televisivo en directo.

Chola, interpretada por Laura Villaverde, co seu Opel Calibra do 2000.
Chola, interpretada por Laura Villaverde, co seu Opel Calibra do 2000.
Chola, a "it girl" máis rompedora

Unha tarde na aldea dos seus pais, Laura Villaverde tivo a idea de crear un personaxe imitando as actuais tendencias da rede, pero que defendese a vida no rural, e así foi como naceu Chola, a quen interpreta no espectáculo "Chola a it girl".

"Estaba coas miñas amigas de toda a vida e comezamos a falar de todo o movemento das 'influencers' e o impacto que teñen. Foi aí cando comecei a ler a moitos blogueiros e blogueiras para construir esta personaxe", recorda a actriz. Disto fai xa un ano, tempo no que Chola abriu o seu propio blog e a súa canle de YouTube, "Chola&Lola", onde da "consellos de beleza 100% natural, aproveitando a sabedoría popular, porque ela é unha it girl rectificada e do rural".

Agora, chega o espectáculo en directo, "Chola a it girl", que se pode ver esta noite no Fetega ás 22,30 horas, no Auditorio Municipal Manuel María. Asegura a actriz que os espectadores se atoparán cunha obra que non é teatro ao uso, senón que "a min gústame dicir que é un show televisivo, pero en directo e que fai pensar á xente, porque ten certa profundidade".


Tampouco Chola é un personaxe ao uso, ela é unha "it girl' rectificada, porque está convencida de que non todo ten que ser perfecto, como algúns mostran nas redes sociais", explica Villaverde sobre o seu alter ego no escenario


Ademais, tanto na web serie "Chola&Lola" como no espectáculo, esta muller aposta polo rural como algo "exquisito e selecto, como sinónimo de calidade de vida. Ademais, Chola ten unha conexión moi forte cos animais domésticos-"Lola é a súa galiña"- e coas súas amigas da aldea, que son interpretadas por actrices como Areta Bolado ou Noelia Castro".

Para aqueles que xa teñan vista a webserie de Chola, saben que esta muller, ademais de "it girl", é mecánica e piloto de rallies, pero no espectáculo haberá sorpresas. "Pasa algo inesperado e ten que confesar a súa paixón máis segreda, o que deriva nunha reflexión de que non todo é perfecto e as dificultades que ten por ser unha mecánica nun mundo de homes".