O subdelegado do Goberno en Ourense, Emilio González, e a alcaldesa de Maceda, Uxía Oviedo, co-presidiron onte a terceira reunión da Xunta local de Seguridade do municipio, na que analizaron detalladamente os datos sobre seguridade cidadá durante o último ano.
Emilio González destacou a gran acollida que ten o Plan Director no concello de Maceda, que no presente curso duplicará as charlas no 50% dos centros educativos das vilas e aumentará e diversificará as temáticas. Durante o curso 2022-2023 impartíronse cinco charlas nos centros educativos de Primaria e Secundaria sobre acoso escolar; consumo de drogas e alcol e violencia de xénero. Neste curso ampliarase a temática con conferencias sobre o uso de novas tecnoloxías.
Continuarase cos dispositivos de vixilancia nas inmediacións dos centros educativos para previr o tráfico, consumo e tenencia de drogas, así como todo tipo de condutas violentas. Os datos indican que o índice de criminalidade de Maceda é un dos máis baixos da provincia de Ourense.
