Allariz prepárase para celebrar o nadal cunha programación chea de actividades para todos os públicos, dende o 16 de decembro ata o 5 de xaneiro.
Nunha rolda de prensa, a alcaldesa de Allariz, Cristina Cid, xunto cos concelleiros de Cultura, Alberto Conde, e de Promoción Económica, María López, presentaron as diversas actividades que terán lugar durante as festividades.
A veciñanza gozará dunha variedade de eventos, como concertos, monólogos de humor, teatro, obradoiros e actividades típicas da tempada, como a Carreira Solidaria que despide o ano e a Cabalgata de Reis Magos, o día 5 de xaneiro.
Os máis pequenos terán a oportunidade para gozar de obras de teatro durante este nadal. O 16 e 23 de decembro presentaranse as obras “Cecilia e a súa boneca” e “Backstage” na Casa da Cultura de Allariz ás 18,30 horas ambos os días. Ademais, o sábado 16 de decembro, ás 22,30 horas, o Campo da Barreira acollerá o concerto dos alaricanos Roña e Kulo de Rata.
O domingo 17, a Escola da Banda Unión Musical de Allariz ofrecerá un concerto de balde ás 12,30 horas no mesmo lugar.
Do 26 de decembro ao 3 de xaneiro, o pavillón do IES de Allariz acollerá o Nadal Parc, onde os nenos de ata 12 anos poderán gozar de inchables, áreas de xogo e obradoiros. Os obradoiros teñen capacidade limitada polo que deberase consultar a dispoñibilidade de prazas na Casa da Cultura de Allariz.
O 31 de decembro, celebrarase a Derradeira Solidaria con carreiras para adultos ás 11,00 horas e para nenos ás 12,00 horas, ambas cunha saída dende a Praza Maior.
Sergio Pazos visitará Allariz o sábado para contaxiar humor ás 20:30h na Casa da Cultura. As entradas estarán dispoñibles na mesma Casa da Cultura.
A Cabalgata de Reis Magos partirá dende a Alameda ata o Pavillón do IES de Allariz o 5 de xaneiro ás 18,30 horas.
