O incendio forestal rexistrado na parroquia de Roupar, no municipio de Xermade (Lugo), permanece controlado dende as 11,04 horas deste mércores tras queimar unhas 50 hectáreas, a metade en zona de Rede Natura. O outro lume rexistrado no mesmo municipio quedou extinguido.
Así o informou a Consellería de Medio Rural e do Mar, que indicou que o lume na parroquia de Roupar comezou ás 21,47 horas do martes e quedou controlado ás 11,04 horas deste mércores.
As estimacións provisionais sitúan a superficie afectada nunhas 50 hectáreas, das cales a metade están en Rede Natura 2000. Nos traballos de extinción deste incendio participan un técnico, catro axentes forestais, seis brigadas, sete motobombas e unha pa.
Pola súa banda, o outro incendio que afectaba a parroquia de Xermade, no mesmo municipio lucense, quedou extinguido ás 14,02 horas deste mércores, tras iniciarse ás 21,30 horas do martes.
Segundo as estimacións provisionais, a superficie afectada é de 80 hectáreas, das cales 40 son rasas e a outra metade arboladas. Nos labores de extinción colaboraron tres axentes forestais, catro brigadas e catro motobombas.
