O presunto ladrón roubou coches de Scalextric de colección por valor superior a 2.500 euros, ademais doutros obxectos.
Axentes do Corpo Nacional de Policía da Comisaría de Vigo deteñen a un veciño da cidade de 26 anos por dous delitos de roubo con forza nunha mesma vivenda do centro da cidade, onde entrou dous días seguidos e roubou coches Scalextric de colección por valor superior a 2.500 euros, ademais doutros obxectos.
Tal e como informou a Policía Nacional, a finais de abril do pasado ano o propietario dunha vivenda da avenida da Grande Vía de Vigo informoulles de que sufrira un roubo con forza na súa casa, polo que unha dotación se trasladou ata o lugar.
Unha vez alí os axentes entrevistáronse co home e comprobaron que había diversos danos nos accesos e no interior do domicilio, onde foi violentada a persiana e a porta do balcón, polo que avisaron a brigada de Policía Científica para que fixese unha inspección.
Ao día seguinte de que acontecesen estes feitos, o propietario presentou unha ampliación da denuncia, posto que ao volver á casa notara que o ladrón volvera entrar -para o que se valeu dun xogo de chaves que se levara o día anterior- e roubara novos efectos, entre eles varios coches Scalextric de colección por valor superior aos 2.500 euros.
Todas estas cuestións foron postas en coñecemento da Unidade de Delincuencia especializada e Violenta UDEV-Roubos, que iniciou unha investigación pola que foron vixiados diversos establecementos de compra-venda de artigos de segunda man.
Foi así como conseguiron identificar o varón, que foi localizado e detido para o seu traslado a dependencias policiais, onde se comprobou que o individuo tiña seis antecedentes policiais anteriores, varios deles polos mesmos feitos.
