A comunidade galega foi a oitava que perdeu máis poboación en termos relativos, segundo o INE
Galicia perdeu 17.289 habitantes nun ano ata situarse, a 1 de xaneiro de 2015, cun total de 2.731.406, o que representa unha caída do 0,6% en relación co 1 de xaneiro de 2014. Con esta porcentaxe de baixada, no mesmo período, foi a oitava comunidade española que perdeu máis poboación en termos relativos.
Segundo os datos do Padrón Continuo difundidos este martes polo Instituto Nacional de Estatística (INE), a comunidade galega, con 1.316.727 homes e 1.414.679 mulleres, perdeu habitantes nas catro provincias con respecto ao 1 de xaneiro do ano pasado.
Igualmente, os últimos datos do INE ratifican que só tres cidades superan na comunidade os 100.000 habitantes --A Coruña, Vigo e Ourense--. Nas tres vive o 23,6% da poboación da comunidade.
O maior número de concellos concéntranse na franxa de entre 1.001 e 10.000 habitantes. En total, 231 dos 314 da comunidade inclúense neste arco, que acumula o 29,6% da poboación de Galicia.
En xaneiro de 2015, unha media do 3,3% da poboación galega era estranxeira. A maior porcentaxe de estranxeiros (un 4,2%) rexístrase en Ourense; fronte a o 3,7% de Lugo, ao 3,4% de Pontevedra e o 2,9% da Coruña.
EN ESPAÑA CAE O NÚMERO DE ESTRANXEIROS
No conxunto do Estado, o número de estranxeiros residentes en España caeu en 2014 en 304.623 persoas, case a metade do que descendeu o ano anterior, cando se contaban 545.980 estranxeiros menos. Mentres, o número de españois aumentou en 134.231 (un 0,3%).
En total, a poboación inscrita en España a 1 de xaneiro de 2015 era de 46,6 millóns, o que supón un descenso de 170.392 persoas con respecto ao ano anterior. Por nacionalidade, 41,8 millóns son españois e 4,7 millóns, estranxeiros, o que representa o 10,1%.
Trátase do cuarto ano que se reduce o número de foráneos dende 2011, cando caeron en 15.229 persoas. En 2012 reduciuse o seu número en 190.020; en 2013, en 545.980; e finalmente, en 2014, en 304.623. Así, dende 2011, España perdeu máis dun millón de estranxeiros.
Entre os cidadáns estranxeiros empadroados en España, os pertencentes á Unión Europea diminuíron en 114.304, ata un total de 1,9 millóns de persoas, mentres que os non comunitarios se reduciron en 190.319 persoas, situándose en 2,7 millóns.
Entre os europeos, 751.208 son romaneses, seguidos polos 282.120 británicos e os 179.129 italianos. Entre os estranxeiros non comunitarios, os marroquís alcanzan os 749.274, os chineses superan os 191.000 e os ecuatorianos, os 176.247.
Dos datos do Padrón tamén se desprende que o 49,1% son homes fronte ao 50,9% de mulleres e que a media de idade é de 42,4 anos. Concretamente, o 16% da poboación ten menos de 16 anos, o 38,6% ten entre 16 e 44 anos e o 45,4% ten 45 ou máis anos.
En canto ao descenso do total da poboación, o INE explica que é unha tendencia que comezou en 2012 cando as inscricións netas de estranxeiros comezaron a ser negativas. Non obstante, dende o ano 2000 e ata estes últimos anos, a poboación empadroada aumentara anualmente.
COMUNIDADES MÁIS POBOADAS
Por comunidades autónomas, as máis poboadas son, ao igual que a 1 de xaneiro de 2014, Andalucía, Cataluña, Comunidade de Madrid e Comunidade Valenciana. Mentres, as que menos poboación teñen seguen sendo La Rioja, Cantabria e Navarra.
No último ano a poboación caeu en todas as comunidades autónomas agás en Islas Baleares, onde aumentaron en 517 persoas e Rexión de Murcia, con 231 empadroados máis. Tamén aumenta na cidade autónoma de Melilla con 988 persoas máis.
Pola súa banda, a Comunidade Valenciana, Castilla e León e Castilla-La Mancha son as que experimentaron as maiores reducións de poboación en 2014 en termos absolutos.
