Todolos grupos aprpbaron por unanimidade unha proposta do PP.
Os grupos do Parlamento galego aprobaron onte por unanimidade unha proposición non de lei na que piden á Xunta que organice ao longo do ano, con motivo do 35 aniversario da súa morte, actividades para divulgar a obra do escritor galego Eduardo Blanco Amor.
A proposta, debatida a instancia do PPdeG, insta tamén a "fomentar" estudios e congresos que actualicen e afonden no significado da biografía, pensamento e obra do autor da Esmorga, ademais de elaborar material audiovisual ao respecto para mostrar "a súa importancia na defensa da democracia, a igualdade de dereitos para todas as persoas e, en concreto, da súa reivindicación do respecto pola condición afectivo-sexual das persoas".
No debate da iniciativa, que se produciu onte, o deputado popular Miguel Santalices destacou que "ninguén dubida hoxe de que a mellor novela escrita en galego é A Esmorga" e instado a buscar a "coordinación entre institucións para render o mellor recoñecemento" a Blanco Amor.
Todos os grupos da oposición se mostraron dacordo en homenaxear o autor ourensán, pero pediron máis concreción na proposta, que finalmente incorporou varias das emendas do BNG e AGE.
O voceiro socialista no debate, Francisco Caamaño, destacou que Blanco Amor era unha persoa "impertinente, crítica e imprescindible". No mesmo sentido, o representante de AGE, Xabier Ron, resaltou a súa loita polos valores democráticos e referiuse á censura que sufriu a súa obra e os problemas para publicala.
Tamén o fixo a única representante do Grupo Mixto, a ourensán Carmen Iglesias, que fixo fincapé en que Eduardo Blanco Amor foi "ultrajado" pola súa homosexualidade e "abandonado pola cultura oficial".
Por parte do BNG, Ana Pontón indicou que é "unha evidencia" que se trata dun dos mellores escritores en lingua galega e reivindicou que era "provocador e irreverente".
