O TSXG afirma que non hai "indicios abondos" de que a maxistrada incorrera nun delito de prevaricación na súa investigación sobre o socialista
A Sala do Civil e o Penal do Tribunal Superior de Xustiza de Galicia (TSXG) decidiu non admitir a trámite a querela presentada polo último secretario xeral do PSdeG, José Ramón Gómez Besteiro, contra a xuíza Pilar de Lara, que o investiga no marco do caso Garañón e da operación Pulpo.
Diso informaron fontes xudiciais, que precisaron que a postura do alto tribunal galego coincide coa materializada pola Fiscalía nun informe: que non hai "indicios abondos" de que a maxistrada incorrera nun delito de prevaricación na súa investigación sobre o socialista.
Na querela, o tamén expresidente da Deputación de Lugo acusa a De Lara de "prevaricación xudicial" e sitúase como obxecto da "inxusta e arbitraria imputación" de varios delitos.
