A Consellería de Cultura apoia a oferta cultural no rural a través da súa aposta polo ciclo de música relixiosa de San Martiño de Barcia de Mera, en Mondariz (Pontevedra), que celebrará este ano a súa sexta edición.
O cartel coa programación deste evento, que desenvolverase entre os meses de abril e setembro, foi presentado este martes nunha rolda de prensa que tivo lugar no Balneario de Mondariz e que contou coa participación do secretario xeral de Cultura, Anxo Lorenzo.
O ciclo constitúe un encontro coa música clásica que durante os pasados anos foi alcanzando un lugar destacado no panorama cultural da provincia de Pontevedra. O programa da súa sexta edición ofrecerá seis actuacións.
O concerto inaugural, 'Música na Real Corte Aragonesa', correrá a cargo de Ensemble Vocal Thesaurus e celebrarase o 26 de abril, ás 20.30 horas, na Igrexa de San Martiño de Barcia de Mera.
A seguinte actuación, cun repertorio de barroco americano, chegará o 24 de maio da man de Vox Stellae Ensemble; mentres que o 21 de xuño será a quenda da ópera e o oratorio nas voces de Diego Neira e Cecilia Rodríguez-Morán, acompañados ao piano por Jesús López.
O concerto 'Bach, sonatas para órgano e frauta' continuará a programación, o 19 de xullo, a cargo de Joaquín Barreira (órgano) e Xabi Louriña (frauta); e o 15 de agosto actuará Voz Organalis coa misa mozárabe.
O peche do ciclo musical terá lugar o sábado 20 de setembro, ás 20.30 horas, cun programa barroco composto de pezas de Victoria, Mudarra e Monteverdi, entre outros. O espectáculo correrá a cargo da mezzosoprano Marta Velasco e Ramiro Morales (tiorba).
