O PSdeG-PSOE da cidade anunciou onte que organizará un acto este vindeiro mércores, 1 de maio, “para continuar reclamando os dereitos das e dos traballadores”, segundo trasladaron dende a agrupación municipal. A comisión executiva dos celebrará unha ofrenda floral ante o busto do fundador do PSOE, Pablo Iglesias Posse, con motivo do Día Internacional dos Traballadores. No acto participarán tamén representantes do sindicato Unión Xeral de Traballadores (UXT).
Dende o PSdeG explicaron que no acto intervirán o secretario comarcal do sindicato en Ourense, Cristóbal Medeiros; o secretario provincial dos socialistas, Rafael Villarino, e a secretaria xeral do partido na cidade, Natalia González. O acto terá lugar ás 10,30 horas na rúa Pablo Iglesias, onde está situado o monumento en conmemoración do histórico dirixente do Partido Socialista.
“Esta data non debe ser para celebrar”, sinalou González, “senón para continuar loitando polos dereitos perdidos e todos aqueles que quedan por conquistar”. A tamén portavoz do grupo municipal no Concello de Ourense engadiu que a efeméride do 1 de maio debe servir tamén “para esixir que se derruben os teitos de cristal que aínda continúan en pé”.
Despois da homenaxe e “reivindicación por continuar mellorando as condicións laborais da clase traballadora e reducir a fenda salarial”, explican dende o PSdeG, “a agrupación municipal tamén percorrerá as rúas de Ourense na manifestación convocada para o mediodía”.
A UXT mobilizarase de xeito conxunto con Comisións Obreiras (CCOO) na cidade. A marcha partirá do Pavillón dos Remedios ás 12,00 horas. Por outra banda, a Confederación Intersindical Galega (CIG) organiza a súa manifestación ás 11,30 horas na praza Maior.
