Un monxe anónimo nos días de Paixón

Instalados plenamente na Pascua, semella hoxe acaído traer a colación a un monxe que a comezos do século XIX cumpría cos mandatos da regra bieita dentro dos muros do mosteiro celanovés. Con paciencia eremita, entre as horas do “ora et labora”, este enigmático asceta deixou escrito un curioso relato sobre a vida cotiá da comunidade “negra” rosendiana, de onde extraio como vivían a Semana Santa naqueles días de entre 1809 e 1814, nos que aínda non se recuperaran do pavor que lles ocasionara o paso dos franceses pola bisbarra. A comezos dos anos noventa, procedente dunha librería de vello entrou no arquivo do Instituto de Estudos Padre Sarmiento un documento que respondía ós trazos dun monxe descoñecido que no intre da publicación (1815) residía no cenobio celanovés e no que, con todo luxo de detalle, describiu como se desenvolvía daquela a vida cotiá nunha comunidade próxima ó cento de internos. Baixo o epígrafe de “Rosendo y Celanova, a la hora de la despedida”, o manuscrito foi estudado e transcrito polos profesores José Miguel Andrade Cernadas e José García Oro e calquera que desexe darlle unha lectura completa non ten máis ca teclear este título para procurarala na rede. Non eran tempos compracentes, aqueles da segunda década do século, nin para o país en xeral nin para as comunidades relixiosas en particular. E, nin moito menos, eran esperanzados os que estaban por chegar nas dúas décadas seguintes, coa ameaza da exclaustración final como espada de Damocles pendurando sobre o futuro inmediato de tódolos mosteiros. Sen embargo, o anónimo cronista -din Andrade e García Oro- “narra con serenidad y sin enterarse de lo que acontece fuera de los muros monásticos, la vida interna de la comunidad de Celanova, que sigue presidida por el veterano Rosendo”. Son profusas e desmiuzadas as explicacións do cronista, tanto sobre o desenvolvemento horario de cada xornada, sempre dentro do marco do “ora et labora” e das oito horas canónicas, como respecto das ocupacións de cada monxe, así como, dun xeito especial, en relación coas celebracións que ordea o calendario ó longo do ano. Neste sentido, é evidente que a conmemoración da Pascua, dos días da Paixón ou da Semana Santa, atópanse recreados con igual profusión, baixo o enunciado apreciativo de, “la Semana Santa tiene gran esplendor en Celanova”. Así, nunha primeira aproximación, o escribán cenobita indica que a semana comeza “con la celebración de los Dolores de Nª Sª; se realza solemnemente con la procesión pública de Domingo de Ramos, a la que ocurren los oficiales de la villa y del señorío monástico; se vigoriza el Jueves Santo con la celebración de la Cena del Señor y el lavado de los pies en dos tandas, una de monjes y otra de pobres; se patentiza de modo particular el Viernes Santo, en que los monjes suelen caminar descalzos por el recinto monástico; pasa el Sábado Santo en silencio de oración y visita a las Estaciones o altares de los claustros, y todo concluye el Domingo de Pascua en el que se lucen los ornamentos ricos y la música de órgano anima las celebraciones, terminando con el acostumbrado banquete en la mansión del Padre Abad”. Logo, xa nun reparto diario das horas e das funcións segundo as ocupacións dos monxes na estrutura organizativa da comunidade, o cronista explica como, por exemplo, o Domingo de Ramos “se dispensa un cuarto de hora de oración a Prima, se entra a Tercia a las nueve y a Vísperas a las dos y media”, mentres o “Padre Abad distribuye los ramos y, de los seculares de afuera, sólo el señor alcalde y el médico los vienen a recibir de mano de Su Paternidad”. Así mesmo, detense en como ó longo da semana deben “asistir a Coro todos los oficiales exentos del monasterio, a excepción del granero y mayordomo”, sinalando tamén o privilexio daqueles que “cantan la Pasión” porque “tienen chocolate en la cámara y extraordinariamente en el refectorio, en los días en que cantan”. O lavatorio dos pés, a chave do tabernáculo, pescado para os monxes e carne para o abade O “Lavatorio dos pés” A actividade monacal estaba milimetricamente taxada ó longo da semana para todos e cada un dos membros da comunidade. Dende o lavatorio dos pés, na xornada do Xoves Santo, ata a cea do Domingo de Resurrección, cada quen sabía perfectamente o que tiña que facer e centrábase niso baixo a rigorosa observancia do “Padre Abad”, que o controlaba todo, especialmente durante os días propios da paixón, morte e resurrección do “Santísimo”. O primeiro destes días -é dicir, o xoves- “se entra a Prima a las seis y media” para logo saír en formación de dous coros “hasta la pieza de la barbería”, a onde acceden para limparen os pés “el prior mayor y los once monges menos ancianos que por la tarde han de ser lavados por el Padre Abad”. Do lavatorio ós pobres encargábase o prior maior, mentres o abade acompañábaos ata a “cillerería”, onde eran convidados a xantar “lo mismo que la comunidad”, servidos polos propios freires e polo abade, “que sólo sirve al pobre que hace de Cristo”. Rematado o xantar, o abade adoitaba concederlle unha “limosna de dos reales al presidente y el mayordomo un real a todos los demás”. A partir de aí establecíase unha quenda “distribuida por medias horas” para “velar al Santísimo”, logo de terlle sido entregada a chave do tabernáculo ó abade “quien la llevará colgada delante del pecho siempre que salga de la cámara, en ese día y el siguiente”. “Detención de Xesús” nos alabastros de Celanova A “Prima” do venres comezaba no coro baixo, mentres que para a de “Vísperas” utilizaban o coro alto dedicados á oración mental e ós misereres, ademais de ó rezo de “cinco Padrenuestros y Avemarías” que os liberaba do xaxún a pan e auga de noutrora, así como da obriga de andaren descalzos todo o día polo convento. O recollemento dos días anteriores vía a luz cos “Maitines” do domingo de resurrección ás catro e media da mañá, as “Laudes” e a “Prima, que se lleva con alguna pausa, aunque procura el organista ser corto en sus versos” para finalizar cun convite a chocolate. Para celebrar a resurrección “la comunidad come hoy pescado en el refectorio”, mentres “los padres comen con el Padre Abad y se les da carne”, rematando cunha cea que es de “huevos y chanfaina, patas y postre de queso”, que estou por ver que lles sabería -nunca mellor dito- a gloria bendita.