O Campus Aberto da Universidade de Vigo ofrece máis de dezaseis títulos propios para o vindeiro curso 2023/2024
O Campus Aberto engloba toda a formación permanente da Universidade de Vigo, unha oferta que inclúe dende mestrados propios e títulos de especialización ata cursos de curta duración para persoas sen titulación universitaria previa. En total, para o primeiro cuadrimestre do próximo curso ofértanse máis de 16 programas formativos que nacen das demandas sociais e da colaboración con empresas e entidades externas.
Alfonso Lago Ferreiro é o Vicerreitor de Titulacións e Innovación Docente, e María José Moure Rodriguez, a directora da Escola Aberta de Formación Permanente da Universidade de Vigo.
Que é o Campus Aberto da Universidade de Vigo?
MJ: Cando nós falamos de Campus Aberto, o que falamos é dunha universidade que está aberta a todas as persoas. A diferenza de hai anos nos que a universidade era un espazo para os mozos e as mozas, agora é un espazo para todas as idades, e cremos na universidade non soamente para formase nun grao, mestrado o doutoramento, senón para a formación ao longo da vida.
A apertura da matrícula dos títulos propios da UVigo comezou o 17 de xullo e vai estar aberta ata o 11 de setembro.
MJ: Temos diferentes títulos, os de posgrao buscan a especialización das persoas nunhas competencias profesionais e para este tipo de estudos as persoas teñen que ter unha titulación universitaria previa. E temos outros moitísimos títulos que chámanse de formación universitaria, aos cales pode acceder calquera persoa sempre que sexa maior de idade. Normalmente temos cursos curtos que abren a súa matrícula ao longo de todo o curso.
É dicir, que hai diferentes duracións tamén nos títulos.
MJ: Si, temos cursos que van ao longo de todo o ano e cursos curtos que poden durar unha semana. O que buscamos sempre tamén son horarios compatibles co traballo e coa familia. Ademais os cursos poden ser presencial, en liña, etc.
Falemos dos títulos. Para este curso, hai novidades.
MJ: Como novidades temos cursos moi interesantes como o Experto en Inglés xurídico, que vén dunha demanda do Colexio de Avogacía de Vigo, porque no ámbito xurídico internacional cada vez é máis importante o dominio do inglés. Tamén temos como novidade o Máster en Información xeoespacial, orientado a persoas do ámbito científico tecnolóxico que queiran especializarse neste campo. E temos outras formacións como especialista en Edición de libros, Industria musical, Tradución para a industria do videoxogo, ou o curso de Proteccións eléctricas en subestacións.
AL: É de destacar o Máster de Información xeoespacial, o primeiro título dual dentro da formación permanente da UVigo. É un paso importante, porque os máster duais teñen unha carga docente importante dentro das empresas. Realizase en colaboración cun clúster que vai permitir que ese estudantado se achegue á realidade das empresas.
Cales son os títulos máis consolidados?
AL: Vai a empezar a sexta edición do curso de especialista en Electrónica para compoñentes da automoción, que é un curso que se ven facendo coa colaboración da empresa BorgWarner, onde o alumnado é maioritariamente profesional. Coa incorporación da electrónica ao automóbil necesitan uns cursos adaptados e esa especialización.
Os títulos que oferta o Campus Aberto son demandados pola sociedade, pero tamén polas empresas. Cal é a ligazón con elas?
MJ: É moi importante porque ofrecemos unha formación moi vencellada ás necesidade sociais e empresariais e polo tanto deseñamos unha formación que ten unha repercusión directa na empresa e na empregabilidade das persoas. É moi importante nese sentido, pero tamén no sentido da docencia, porque nos títulos propios participan moitos profesionais externos, e combínase a experiencia académica docente do profesorado da UVigo con profesionais da empresa que imparten unha formación máis en contacto coa necesidade real.
Que son as microcredenciais?
MJ: Son a formación permanente do futuro, porque trátase de formacións curtas no tempo, pero que teñen unhas competencias moi específicas, cuns resultados de aprendizaxe que ademais certifícanse dixitalmente. De tal forma que a persoa pode ter unha serie de certificados acumulables que vanse sumando ao seu curriculum. Iso vai a facilitar que as persoas podan optar a traballos mellores e ter na súa propiedade dixital todas estas certificacións.
Hai bonificacións ou descontos para certos colectivos ou estudantes.
MJ: As subvencións que temos da Deputación de Ourense ou do Consello Galego de Relacións Laborais fan que o prezo de matrícula sexa moi pequeno. Son formacións moi asequibles para todas as persoas. É importante destacar que as empresas cando forman aos seus traballadores na UVigo teñen a posibilidade de bonificar esa formación a través da Fundae. Polo tanto, hai que pensar que a universidade ofrece unha formación de calidade a un prezo reducido. As persoas que son egresadas da UVigo que forman parte da Comunidade Alumni, os alumnos da Universidade e as persoas con discapacidade ou en situación de desemprego teñen tamén reducións de prezo.
Por último, cales son as liñas de futuro?
AL: O Campus Aberto da Universidade de Vigo está dentro da Escola Aberta de Formación Permanente que proximamente transformarase no Centro de Posgrao de Formación Permanente. E non só se dedicará aos títulos propios, á formación de profesorado ou de persoas maiores, senón que desenvolverán as microcredenciais universitarias, que serán un aspecto moi importante no futuro. Será importante tamén a captación de alumnado estranxeiro, polo tanto hai que crear unha formación moito máis flexible e adaptada ao curriculum doutros países, que poidan incluso homologarse despois. Sobre todo vendo que a nova lei fai unha énfase importante cara o espazo iberoamericano. Coa incorporación da UVigo ao consorcio europeo Athena, estamos a traballar na creación de cursos máis transversais.
