Investigadores do campus elaboraron catro capítulos do monográfico
Investigadores dos grupos de Termofísica Molecular e Física Aplicada do campus de Ourense participan por primeira vez nun monográfico da Royal Society of Chemistry (RSC), unha prestixiosa sociedade científica do Reino Unido que traballa dende 1980 no avance das Ciencias Químicas e que acaba de publicar o Propiedades volumétricas. Líquidos, Disolucións e Gases, unha ampla guía sobre os últimos progresos neste eido. Estes cinco investigadores da Universidade de Vigo xunto con dous egresados son coautores de catro dos 22 capítulos que compoñen a publicación, elaborados por científicos de 12 países, como Alemaña, Canadá, Estados Unidos, Israel ou Xapón. “É a primeira vez que os nosos grupos de investigación participan nun proxecto deste estilo, o que fala moi positivamente dos progresos realizados ao longo dos 25 anos de vida da Universidade tanto no plano institucional como a través do esforzo diario dos investigadores”, salientou un dos autores, Claudio Cerdeiriña.
Son científicos de tres xeracións da Universidade de Vigo especializados na área da Química Física e pertencentes aos grupos dirixidos por Luis Romaní e José Luis Legido que traballan aplicando ideas, conceptos e ferramentas da Física ao análise de sistemas que son obxecto do estudo da Química, como os líquidos ou os gases.
